پۆلیسی دارستان و ژینگەی سلێمانی دەنگۆی ئازادکردنی بکەری بڕینەوەی داری تەڕ لە پێنجوێن ڕەتدەکاتەوە

ئاڤا نیوز

لە سنووری سلێمانی و بە دیاریکراوی قەزای پێنجوێن، پۆلیسی دارستان و ژینگە 18 کورەی خەڵوزیان تێکدا کە بەنایاسایی دروستکرابوون و دواتر دەنگۆی ئەوە بڵاوبووەوە کە بکەری ئەو کارە دوای دەستگیکردنی ئازادکراوە، پۆلیسیش ڕەتی دەکاتەوە.

چیرۆکی سەرەکی: بەمەبەستی پاراستنی سرووشتی کوردستان و ڕێگریکردن لە بڕینەوەی داری دارستانەکان لەسنوری قەزای پێنجوێن، سەرلەبەیانی  ڕۆژی چوارشەممە مەفرەزەیەکی هاوبەش لەنێوان بەشی پۆلیسی دارستان و ژینگە و ئاسایش هەڵمەتێکی مەیدانیان کرد لە ناحیەی گەرمک لە گوندی شێرە توانیان 18 کورەی خەڵوز تێکبدەن کە بەنایاسایی دروست کرابوون.

لێدوانی فەرمی: هێمن کەمەرخان، گوتەبێژی پۆلیسی دارستان و ژینگەی سلێمانی بە ئاڤای گوت، "ئەو کەسەی لەسەر بڕینی داری تەڕ لەسنووری پێنجوێن دەستگیرکراوە، ئازادنەکراوە، هەر کەسێک لەسەر ئەوە دەستگیربکرێت و ڕووبەڕووی یاسا دەکرێنەوە."

زانیاریی زیاتر: بە گوتەی هێمن کەمەرخان ئەو کەسەی کورەی خەڵووزی لە گوندی شێرە هەبووە، ڕێگەپێدانی هەبووە بۆ دروستکردنی کورە، بەڵام بڕینەوەی داری تەڕ نایاساییە و لەسەر ئەوە دەستگیرکراوە.