نەتەوەیەکگرتووەکان: ژیریی دەستکرد کاریگەری لەسەر 40% هەلی کاری جیهان دەبێت

ئاڤا نیوز

 

پێشبینی دەکرێت بەهای بازاڕی جیهانیی ژیریی دەستکرد تا ساڵی 2033 بگاتە 4.8 تریلیۆن دۆلار کە بە نزیکەیی قەبارەی ئابووریی ئەڵمانیایە.

 

ڕاگەیێنراوی فەرمی: ڕێکخراوی بازرگانی و گەشەپێدانی نەتەوەیەکگرتووەکان لە ڕاپۆرتێکێدا ئاماژە بۆئەوە دەکات، ژیریی دەستکرد دەتوانێت لە سەرانسەری جیهاندا کاریگەری لەسەر 40%ی هەلی کارەکان هەبێت. ڕاپۆرتەکە دەشڵێت، ژیریی دەستکرد بەرهەمهێنان باشتر دەکات بەڵام نیگەرانییەکانیش لەبارەی پشتبەستن بە ئامێرەکان و گۆڕینی شێوازی کارکردن دروست دەکات.

 

لێدوانی فەرمی: ڕێبێکا گرینسپان، بەرپرسی ڕێکخراوی بازرگانی و گەشەپێدانی نەتەوەیەکگرتووەکان ڕایگەیاند، پێویستە هاوکارییە نێودەوڵەتییەکان زیادبکرێن و وڵاتان بتوانن بەشداریی بکەن لە دروستکردنی چوارچێوەیەکی جیهانی بۆ ژیریی دەستکرد.

زانیاریی زیاتر: "مێژوو دەریخستووە کە هەرچەندە پێشکەوتنی تەکنەلۆژیا، گەشەی ئابووری دەباتە پێشەوە، بەڵام بەمجۆرە داهات بەشێوەیەکی دادپەروەرانە بەسەر خەڵکدا دابەش ناکرێت یان گەشەپێدانی مرۆیی گشتگیر بەرەوپێش نابات".

 

ئەوەی پێویستە بیزانیت: بەپێی ڕاپۆرتەکەی نەتەوەیەکگرتووەکان، گەورەترین زیان بە ئابووریی وڵاتانی پێشکەوتوو دەگات، سەرەڕای ئەوە ئەو وڵاتانە لە پێگەیەکی باشتردان بۆ ئەوەی سوود لە ژیریی دەستکرد وەربگرن لە چاو ئابووریی وڵاتانی گەشەسەندوو.

 

ئەوەش بزانە: لە ساڵی 2023، بازاڕی تەکنەلۆژیا پێشەنگەکان، وەک ئینتەرنێت، ئاڵوگۆڕی ئۆنلاین، فایف جی، چاپی سێ ڕەهەندی و ژیریی دەستکرد، بەهای 2.5 تریلیۆن دۆلار بووە و پێشبینی دەکرێت ئەم ژمارەیە لە ماوەی دەیەی داهاتوودا شەش هێندە زیاد بکات و بگاتە 16.4 تریلیۆن دۆلار.