وەزارەتی نەوتی عێراق داوای کۆبوونەوەی بەپەلە لەبارەی نەوتی کوردستان دەکات

ئاڤا نیوز

وەزارەتی نەوتی عێراق ️داوای کۆبوونەوەی بەپەلە دەکات لەگەڵ لایەنە پەیوەندیدارەکان بۆ دەستپێکردنەوەی دانوستانەکان لەسەر هەناردەکردنی نەوتی هەرێمی کوردستان.

وێنە گەورەکە: سەرەڕای هەموارکردنەوەی یاسای بودجە و دیاریکردنی 16 دۆلار بۆ تێچووی هەر بەرمیلێک نەوت، بەڵام تا ئێستا هیچ وادەیەک بۆ هەناردەکردنەوەی نەوتی کوردستان دیاری نەکراوە، کۆمەڵەی پیشەسازی نەوتی کوردستان (ئەپیکور)ـیش هۆکاری دەستپێنەکردنەوەکەی دەخاتە ئەستۆی وەزارەتی نەوتی عێراق.

ڕاگەیێنراوی فەرمی: وەزارەتی نەوتی عێراق لە ڕاگەیێنراوێکدا وەڵامی ڕاگەیەندراوەكەی کۆمەڵەی پیشەسازیی نەوتی کوردستان (ئەپیکۆر) دەداتەوە ڕایدەگەیێنێت:

• لێدوانی ئەپیکۆر لەبارەی نەبوونی نیازی وەزارەتەکەمان بۆ دانوستان لەسەر چارەسەرکردنی پرسی جێبەجێکردنی ئەو گرێبەستانەی لەنێوان کۆمپانیاکانی ئەپیکۆر و حکومەتی هەرێمی کوردستان واژۆکراون "درۆن و چەواشەكارین".

• بۆ دڵنیابوون لە جێبەجێکردنی دروستی یاسای بودجە کە لە 2ـی شوباتی 2025 پەسەندکرا، بۆ ئەوەی بتوانرێت بە زوترین کات هەناردەکردنی نەوتی هەرێمی کوردستان لە ڕێگەی بۆری عێراق - تورکیاوە دەست پێبکاتەوە، لە هەموارکردنەوەی یاسای بودجەدا هاتووە، وەزارەتی دارایی فیدڕاڵی قەرەبووی تێچووی بەرهەمهێنان و گواستنەوەی نەوتی خاو دەکات کە ڕادەستی کۆمپانیای بەبازاڕکردنی نەوتی عێراق (سۆمۆ) یان بۆ وەزارەتی نەوت دەکرێت.

•  هاوکات مەرجی ئەوەی داناوە کە خەمڵاندنی دادپەروەرانە بۆ تێچووی بەرهەمهێنان و گواستنەوە بۆ هەر کێڵگەیەک بە جیا، لەلایەن ڕاوێژکارێکی نێودەوڵەتییەوە هەژمار دەکرێت.

•  حکومەتی عێراق هەنگاوی کۆنکرێتی و جددی ناوە بۆ نیشاندانی نیازپاکی خۆی لە دانوستانەکان و دڵنیابوون لە دەستپێکردنەوەی هەناردەکردنی نەوت لە ڕێگەی بۆری عێراق - تورکیاوە بە خێرایی و بەرپرسیارێتییانە و بەردەوام و لە پێناو بەرژەوەندیی نیشتمانی وڵاتدا کاری کردووە. هەوڵی بەرچاوی داوە بۆ پاراستنی سەرچاوەکانی عێراق و جێبەجێکردنی چارەسەری یاسایی و بەردەوام.

•  محەممەد شیاع سوودانی، سەرۆکوەزیران جەختی لەوە کردەوە کە فرۆشتنی نەوت لە چوارچێوەیەکی نایاسایی لە دەرەوەی بەرپرسیارێتی کۆمپانیای سۆمۆ و میکانیزمی فرۆشتنی، پێشێلکردنی مافەکانی گەلی عێراقە.

•  ئاستەنگی بنەڕەتی لەم دانوستانانەدا ئەوەیە کە هەر کاتێک ڕێککەوتنێکی دیاریکراو بەرەو پێش دەچێت، هەنگاوی نەرێنی دەگیرێنەبەر، بەڵام نەک لەلایەن حکومەتی عێراقەوە، چونکە داواکارییە ناواقیعییەکان لە دەرەوەی چوارچێوە یاساییەکان ڕێگرن لە بەرەوپێشچوون بەرەو چارەسەری کۆتا.

•  گەیشتن بە ڕێککەوتن لە زووترین کاتدا زۆر گرنگە بۆ وەستاندنی فرۆشتنی ناڕاست و نایاسایی و پاراستنی سەروەت و سامانی خەڵکی عێراق.

•  وەزارەتی نەوت داوای کۆبوونەوەیەکی بەپەلە لەگەڵ لایەنە پەیوەندیدارەکان دەکات بۆ دەستپێکردنەوەی دانوستان و دیالۆگ بەمەرجێک دانوستانەکان بەگوێرەی یاسای هەموارکراوی بودجە بێت و میکانیزمێکی کاری ڕوون بدۆزرێتەوە کە مافەکانی عێراق بپارێزێت و پابەندبوونەکانی بەرامبەر وەبەرهێنەران مسۆگەر بکات.

• ئامانجی سەرەکی دەستپێکردنەوەی هەناردەکردنی نەوتە لە ڕێگەی بۆرییەوە بە شێوەیەکی دەستبەجێ و سەلامەت و یاسایی و لە هەمان کاتدا دەستەبەرکردنی سەروەری یاسا و پاراستنی سەرچاوە نیشتمانییەکان بۆ ئەوەی بەشێوەی نایاسایی کەڵکی لێوەرنەگیرێت.