چین 34% باجی بەرامبەر بە هاوردەکردنی کاڵای ئەمریکی دەسەپێنێت

ئاڤا نیوز

وەک وەڵامدانەوەیەک بۆ بڕیارەکەی ترەمپ سەبارەت بە سەپاندنی باج، حکومەتی چین لە 10ـی نیسانەوە باج بە ڕێژەی 34% بەسەر هەموو کەل و پەلێکی هاوردەکراوی ئەمریکادا دەسەپێنێت.

وێنە گەورەکە: دۆناڵد ترەمپ باجی گومرگی بەسەر 50 وڵاتاندا سەپاند، هەموو ئەو وڵاتانەش بە بەرپرسیار دەزانێت کە مامەڵەی خراپیان لەگەڵ ئەمریکا کردووە یەکێک لەو وڵاتانەش چین بوو کە باجی بەسەردا سەپاند.

ڕاگەیێنراوی فەرمی: وەزارەتی دارایی چین ڕۆژی هەینی کۆمەڵێک باجی گومرگی و سنووردارکردنی زیاتری بەسەر کاڵاکانی ئەمەریکا ڕاگەیاند وەک ڕێوشوێنێک بۆ بەرپەرچدانەوەی باجی گومرگی سەرۆکی ئەمەریکا، ڕایگەیاند: لە 10ـی نیسانەوە باجی گومرگی زیاتر بە ڕێژەی 34% بەسەر هەموو کاڵاکانی ئەمەریکا دەسەپێنێت.

زانیاریی زیاتر: چین یەکێکە لەو وڵاتانەی کە بەهۆی بریارەکانی ترەمپ، ئەم هەفتەیە زۆرترین زیانی بەرکەوتووە، بۆیە بڕیاریدا ڕێوشوێنی بەرپەرچدانەوەی تووند بگرێتەبەر بۆ تۆڵەسەندنەوە.

لە لایەکی دیکەوە: پەکین ڕایگەیاند: لە ڕۆژی هەینیەوە کۆنترۆڵی هەناردەکردنی بەردە دەگمەنە مامناوەند و قورسەکان بۆ ئەمریکا جێبەجێ دەکات، ئەو بەردانەش بریتین لە سامریۆم، گادۆلینیۆم، تێربیۆم، دیسپرۆسیۆم، لوتیتیۆم، سکاندیۆم و ئیتریۆم.

بۆچوونی لایەنی بەرامبەر: دوای زیادکردنی پێناسی گومرگی لەسەر کاڵا و کۆمپانیا ئەمریکییەکان، ترەمپ دەڵێت: چین ترساوە و ئەمەی دەیکەن هەڵەیە.