گۆتێرێس دوای بڕیارەکانی ترەمپ: لە شەڕی بازرگانیدا کەس سەرناکەوێت

ئاڤا نیوز

 

ئەنتۆنیۆ گۆتێرێس، سکرتێری گشتیی نەتەوەیەکگرتووەکان هۆشداری دا لەوەی "کەس لە شەڕی بازرگانیدا سەرناکەوێت'' ئەمەش وەک کاردانەوەیەک دژی بڕیارەکانی ترەمپ سەبارەت بە سەپاندنی  پێناسی گومرگی.

 

چیرۆکی سەرەکی: ڕێککەوتی 3-4-2025،  دۆناڵد ترەمپ، سەرۆکی ئەمریکا زنجیرەیەک باجی نوێی  بەسەر دەیان وڵاتی جیهان سەپاند و بە تەواوەتی جەنگی ئابووری لە دژی وڵاتانی جیهان ڕاگەیاند. ڕۆژی سەپاندنی پێناسە گومرگییەکانیشی بە "ڕۆژی ئازادیی" ئەمریکا وەسف کرد و ئەمەش کاردانەوەی وڵاتانی بەدوای خۆیدا هێنا.

 

لێدوانی فەرمی: سکرتێری گشتیی نەتەوەیەکگرتووەکان ڕایگەیاند: سیستمی بازرگانیی جیهانی دەچێتە قۆناغێکی گرنگەوە کە هەڕەشە لە گەشەکردن و وەبەرهێنان و پێشکەوتن دەکات، بەتایبەتی لەو وڵاتانەی ئابوورییەکی لاوازییان هەیە.

 

ئەمەش بزانە: ڕۆژی هەینی، ڕێکخراوی  نەتەوەیەکگرتووەکان بۆ گەشەپێدان و بازرگانی لە بەیاننامەیەکدا هۆشداریی دا کە ئەو باجانەی ئەمریکا دەیسەپێنێت زیان بە وڵاتانی هەژار دەگەیێنن و کاریگەری نەرێنی دەبێت.

 

بەتەنیشت ئەم بابەتەوە: چین لەبەرامبەر بڕیاری ترەمپ بۆ سەپاندنی باج ڕایگەیاند، بە ڕێژەی  34% باجی بەسەر سەرجەم هاوردەکراوەکانی ئەمریکا دەسەپێنێت و لە 10ـی نیسانەوە بڕیارەکە جێبەجێدەکرێت.