ڕێكارەكانی پێدانی زەوی بە 55 هەزار فەرمانبەری دیكە دەستپێدەكات

ئاڤا نیوز

 

دوای گەیشتنی لیستی ناوی نزیكەی 55 هەزار فەرمانبەر و كارمەندی ئەمنی و خانەنشینان بە وەزارەتی شارەوانی، قۆناغی سێیەمی ڕەزامەندی بۆ ئەو ناوانە دەرچووە و دەستدەكرێت بە ڕێكارەكانی پێدانی زەوی.

 

وێنە گەورەكە: پرۆسەی تەواوكردنی ڕێكارەكانی پێدانی زەوی و تەرخانكردنی ڕووبەری دیاركراو لەلایەن وەزارەتی شارەوانی و گەشتوگوزار بەر لە جەژن دەستیپێكردووە و پرۆسەكەش بەردەوامە، ئەوەش دوای گەڕانەوەی مامەڵەی سەرجەم فەرمانبەران و كارمەندی ئەمنی و خانەنشینانی شایستە لە دامودەزگا حكومییەكان بۆ وەزارەتی شارەوانی بەمەبەستی پێدانی زەوی بە سەرجەم ئەو فەرمانبەرانەی كە تائێستا لەوەرگرتنی زەوی سوودمەند نەبوونە.

 

لێدوانی فەرمی: سەربەست مەولوود، بەڕێوەبەری كاروباری یاسایی لە وەزارەتی شارەوانی و سەرپەرشتیاری تیمی وردبینی و ڕێکخستنی فۆڕمی دابەشکردنی زەوی بە ئاڤای ڕاگەیاند، دوای گەڕانەوەی نووسراوی لیستی ناوی نزیكەی 55 هەزار فەرمانبەر و كارمەندی ناوخۆ و خانەنشینان بۆ وەزارەتی شارەوانی بە تەرخانكردنی زەوی بۆیان، بەپێی شوێنی نیشتەجێبوون و كارتی زانیاری و بەپێی پارێزگا و ئیدارە سەربەخۆكان، لیستەكان جیادەكرێنەوە و دەستمان كردووە بە ڕەوانەكردنی مامەڵەكان بۆ شارەوانییە پەیوەندیدارەكان.

 

ئەوەی پێویستە بیزانیت: سەرجەم ئەو فەرمانبەرانەی ناویان بۆ وەرگرتنی زەوی دەرچووە لە شارەوانییەكانی سنووری نیشتەجێبوونیان وردبینی سوودمەندبوونیان بۆ دەكرێت و بەپێی بەردەستبوونی زەوی، تیروپشكیان بۆ دەكرێت و زەوی بەڕووبەری 200 مەتر بە هەر فەرمانبەرێك دەدرێت.