ئاڤا بەدواداچوون بۆ کێشەی مووچەی شەش مانگی خانەنشینان دەکات

ئاڤا نیوز

 

خانەنشینان نیگەرانن لەوەی تاوەکو ئێستا مووچەی شەش مانگی 2024 یان بۆ خەرج نەکراوە، بەڕێوەبەرایەتیی گشتیی خانەنشینیش لەوبارەیەوە دەڵێت 'لەمساڵدا پارەکەیان بۆ خەرج دەکرێت'.

 

بابەتی سەرەکی: نزیکەی سێ بۆ چوار هەزار خانەنشینی سەرجەم فەرمانگەکانی حکومەتی هەرێمی کوردستان، کە لە مانگی 7ی 2024 خانەنشین کراون، وەک خۆیان دەڵێن مامەڵەی خانەنشینییەکەیان لە مانگی 11ی هەمان ساڵ بۆ هاتووەتەوە و پێیان وتراوە کە مووچەی مانگەکانی حەوت، هەشت، نۆ، 10 و 11یان لەگەڵ مانگی 12 پێدەدرێت، کەچی تاوەکو ئێستا مووچەکانیان بۆ خەرج نەکراوە، داوایان لە ئاڤا کرد بەدواداچوون بۆ بابەتەکەیان بکات.

 

زانیاریی تایبەت: سەرچاوەیەکی باڵا لە بەڕێوەبەرایەتیی گشتیی خانەنشینی هەرێمی کوردستان، بە ئاڤا میدیای ڕاگەیاند: نووسراوێکمان لەسەر ئەم بابەتە بۆ وەزارەتی دارایی و ئابووری کردووە، بۆ ئەوەی ناوی ئەو کەسانە لە لیستی خانەنشینی دەربهێنن و مووچەی ئەو پێنج مانگەیان بۆ ببەسترێت، 100٪ ئەمساڵ بۆیان خەرج  دەکرێت.

 

زانیاریی بەدەستهاتوو: سەرچاوەکەی بەڕێوەبەرایەتیی گشتیی خانەنشینی هەرێمی کوردستان دەڵێت: ئەو کەسانەی لە ساڵی 2024 خانەنشینکراون ژمارەیان سێ بۆ چوار هەزار کەسە، مووچەی مانگی 12یان هاوشێوەی فەرمانبەرانی دیکە بۆ پاشەکەوت دەکرێت.