د.توانا نەجەف: مووچەی فەرمانبەرانی گرێبەستی خوێندنی باڵا دابەش دەکرێت

ئاڤا نیوز

 

وەزارەتی خوێندنی باڵا و توێژینەوەی زانستی دڵنیایی لە دابەشکردنی مووچەی فەرمانبەرانی گرێبەست دەدات، سەرۆکی دیوانی وەزارەتەکەش دەڵێت 'هیچ مووچەیەکیان نافەوتێت'.

 

بابەتی سەرەکی: بەشێک لە فەرمانبەران و مامۆستایانی گرێبەستی سەربە وەزارەتی خوێندنی باڵا و توێژینەوەی زانستی تاوەکو ئێستا مووچەی مانگی یەکی ئەمساڵیان وەرنەگرتووە، هاوکات مووچەی مانگەکانی دوو و سێشیان وەرنەگرتووە، نیگەرانن و ترسی ئەوەیان هەیە مووچەکانیان بفەوتێت، داوایان لە ئاڤا کرد بەدواداچوون بۆ کێشەکەیان بکات.

 

لێدوانی فەرمی: د.توانا نەجەف، سەرۆکی دیوان و بەڕێوەبەری گشتیی فەرمانگەی کارگێڕی و دارایی لە وەزارەتی خوێندنی باڵا و توێژینەوەی زانستی، بە ئاڤا میدیای ڕایگەیاند: بەشێک لە گرێبەستەکان بە بیانووی دواکەوتنی نوێکردنەوەی گرێبەستەکانیان لەلایەن وەزارەتی دارایی و ئابوورییە مووچەی مانگی یەکیان وەرنەگرتووە.

 

- ئێمە هەموو ڕێکارەکانمان تەواو کردووە و ئێستا بابەتەکە لای وەزارەتی داراییە، بڕیاربوو سەرجەم گرێبەستەکان پێش جەژن مووچەی مانگی یەک و دوو وەربگرن، لە دوای پشووی جەژنەوە لەگەڵ وەزارەتی دارایی و ئابووری لەسەر هێڵێن، خۆم لەگەڵ بەڕێوەبەری ژمێریاری وەزارەتی دارایی قسەم کردووە، ئەویش وتی لەگەڵ گەنجینەکان بۆ دابەشکردنی مووچەکان قسە دەکات.

 

زانیاریی تایبەت: بەڕێوەبەری گشتیی فەرمانگەی کارگێڕی و دارایی لە وەزارەتی خوێندنی باڵا دەڵێت: سەرجەم گرێبەستەکان دڵنیا دەکەینەوە، کە مووچەکانیان نافەوتێت و لە هەوڵداین لە زووترین کاتدا دابەش بکرێت.

 

 باکگراوند: ڕۆژی 2-10-2024، ئەنجوومەنی وەزیرانی هەرێمی کوردستان، بڕیاری دامەزراندنی سێ هەزار گرێبەستی لەسەر داهاتی ناوخۆ بۆ وەزارەتی خوێندنی باڵا و توێژینەوەی زانستی دەرکرد.