وەزارەتی دارایی و ئابووری دەسەڵات بۆ بەڕێوەبەرایەتییەکانی خانەنشینی شۆڕدەکاتەوە

ئاڤا نیوز

 

لەپێناو کارئاسانی و زوو ڕایکردنی مامەڵەی خانەنشینی، وەزارەتی دارایی و ئابووری دەسەڵات بۆ بەڕێوەبەرایەتیی خانەنشینی شارەکان شۆڕدەکاتەوە، ئەمەش بەهۆی زۆری ناڕەزایەتیی ئەو کەسانەی تازە خانەنشین بوون چونکە مامەڵەکانیان زۆر دواکەوتووە.

 

زانیاری تایبەت: سەرچاوەیەک لە بەڕێوەبەرایەتیی خانەنشینی سلێمانی، بە ئاڤا میدیای ڕاگەیاند: ئاوات شێخ جەناب، فەرمانی بە نووسراوێک دەرکردووە، کە دەسەڵات بە بەڕێوەبەرایەتییەکانی خانەنشینی بۆ ڕایکردنی مامەڵەی خانەنشینان بدرێت.

 

-نووسراوێکی دیکە لە بەڕێوەبەرایەتیی گشتیی خانەنشینی بە واژۆی وەزیری دارایی و ئابووریی دەرچووە، کە گشتاندنی بۆ سەرجەم بەڕێوەبەرایەتییەکانی خانەنشینی پێکراوە، تێدا دەسەڵاتی بە بەڕێوەبەرایەتییەکان داوە مامەڵەی خانەنشینان ڕای بکەن و نەینێرن بۆ بەڕێوەبەرایەتی گشتیی خانەنشینی هەرێمی کوردستان، جگە لە مامەڵەی وەزیر و بریکارەکان و بەڕێوەبەرەگشتییەکان و پلە تایبەتەکان و ئەو کەسانەی هەژماری ڕاژەیان هەیە و تەوقیفاتی خانەنشینیان نەداوە. 

 

-مامەڵەی وەزیر و بریکارەکان و بەڕێوەبەرەگشتییەکان و ئەو کەسانەی هەژماری ڕاژەیان هەیە و تەوقیفاتی خانەنشینیان نەداوە، دەگەڕێنرێنەوە بۆ بەڕێوەبەرایەتی گشتیی خانەنشینی هەرێمی کوردستان، دوای ئەوەی ئیشەکانی تەواودەبن و فەرمانی خانەنشینی بۆ دەردەچێت و مووچەیان بۆ دەبەسترێت، ئەو کاتە دەگەڕێنرێتەوە بۆ لای بەڕێوەبەرایەتیی خانەنشینی ئەو شارە و داخلی مووچەی دەکەن.

 

بۆچی گرنگە: ئەم بڕیارانەی دراون ئاسانکاری بۆ ئەو خانەنشینانە دەکات، لە شارەکانی خۆیان مامەڵەکانیان بۆ بکرێت و ناچار نەبێتن بچێتە بەڕێوەبەرایەتیی گشتیی خانەنشینی لە هەولێر و چەند مانگێک چاوەڕوانی تەواوکردنی مامەڵەکانیابن.

 

ئەمەش بزانە: هەرچەندە نووسراوەکان لە مانگی 2 و 3ی ئەمساڵ دەرچوون، بەڵام تاوەکو ئێستا لە بەشێک لە بەڕێوەبەرایەتییەکانی خانەنشینی شارەکان دەسەڵاتەکانیان بەکارنەهێناوە و کاریان بە نووسراوەکان نەکردووە.