هەزاران خانەنشین ماوەی 4 مانگە مووچەیان وەرنەگرتووە

ئاڤا نیوز

یەكێتیی خانەنشینانی كوردستان گلەییان هەیە و دەڵێن هەزاران خانەنشین ماوەی چوار مانگە هیچ مووچەیەكیان وەرنەگرتووە و لە دۆخێكی سەختی ژیاندان.

وێنە گەورەکە: بە پێی یاسای خانەنشینیی عێراق، ئەمساڵ لە دایكبووانی ساڵەكانی 1962، 1963 و 1964 لە هەرێمی كوردستان كە ژمارەیان لە 25 هەزار كەس زیاترە، خانەنشین بوون، بەڵام تا ئێستا تەنیا مامەڵەی نزیكەی هەزار خانەنشین لە هەر چوار پارێزگای هەرێمی كوردستان تەواو كراون و مووچەی سێ مانگیان وەرگرتووە.

لێدوانی فەرمی: سادق شێخ عوسمان، گوتەبێژی یەكێتی خانەنشینانی كوردستان بە ئاڤا میدیای ڕاگەیاند: زیاتر لە 24 هەزار خانەنشین، لەبەر ئەوەی مامەڵەكانیان تەواو نەكراون، لە مانگی 11ـی ساڵی ڕابردووەوە، مووچەیان وەرنەگرتووە، ئەمەش گوزەرانیانی زۆر خراپ كردووە و تووشی چەندان كێشە بوون.

لە لایەکی دیکەوە: سەرچاوەیەكی باڵا لە بەڕێوەبەرایەتیی گشتیی خانەنشینی هەرێمی كوردستان بە ئاڤا میدیای ڕاگەیاند، کێشەکە لە بەڕێوەبەرایەتییەكانی خانەنشین نییە، بەڵكو لەلایەن وەزارەت و فەرمانگەكانەوە مامەڵەكان بە هۆی هەندێ كەموكوڕییەوە كە لە دۆسیەكاندا هەن بۆ بەڕێوەبەرایەتییەكانی خانەنشین نەنێردراون، هەركاتێك کەم و کوڕییەکان چارەسەر کران، بە زووترین كات ڕایی دەكرێن.

زانیاریی زیاتر: سەبارەت بە 24 هەزار خانەنشینەكە، ئەو سەرچاوەیەی بەڕێوەبەرایەتیی گشتیی خانەنشین گوتی، ئێستا لە كۆی هەر 14 بەڕێوەبەرایەتیی خانەنشین كەمتر لە پێنج هەزار دۆسیە و مەلەفی خانەنشنیان هەن و مانگێكی دیكە نابات سەرجەمیان تەواو دەبن، جەختیش دەكاتەوە كە مامەڵەكان لە بەڕێوەبەرایەتییەكانی خانەنشین زۆر بەخێرایی ڕایی دەكرێن و پێویستە وەزارەت و فەرمانگەكانیش بە زووترین كات دۆسیەكان بنێرن.