گۆشتی سووری فرێش بە نرخێكی هەرزان بۆ بازاڕەکانی هەرێمی کوردستان دابین دەکرێت

ئاڤا نیوز

وەزارەتی بازرگانیی عێراق دەستی کردووە بە هەناردەکردنی گۆشتی سووری فرێش و خۆی بە نرخێكی هەرزان بەسەر پارێزگاکان دابەشی دەکات، داواکراوە بەشی هەرێمی کوردستانیش بدرێت و ڕەزامەندی دراوە.

بۆچی گرنگە: کیلۆیەک لەو گۆشتە بە نرخی چوار هەزار و 500 لە بازاڕەکان دەفرۆشرێت. ئەمە لەکاتێکدایە نرخی گۆشتی سوور لە بازاڕەکان زۆر بەرزبووەتەوە و هەندێک ڕۆژ گەیشتووەتە نزیکەی 25 هەزار دینار.

لێدوانی فەرمی:  نەوزاد شێخ كامیل، بەڕێوەبەری گشتیی بازرگانیی هەرێمی کوردستان بە ئاڤا نیوزی  گوت: دەستمان بە ئامادەکاری کردووە بۆ دابینکردنی ساردخانە، لەگەڵ گەیشتنی یەکەم کاروان خۆمان بەسەر پارێزگاکان دابەشی دەکەین.

زانیاریی زیاتر: وەزارەتی بازرگانیی هەرێمی کوردستان داوای لە دوو کۆمپانیای خۆماڵی کردووە ڕاستەوخۆ ئەم جۆرە گۆشتە هاوردە بکەن و ئامادەیی هەموو هاوکارییەکی بۆیان دەربڕیوە.

لەلایەکی دیکەوە: وەلید محەممەد، بەڕێوەبەری گشتیی بەشی ئاژەڵداریی وەزارەتی کشتوکاڵی عێراق ڕایگەیاندووە، لەم ماوەیە 65 هەزار سەر ئاژەڵ هاوردەکراون، بۆیە پێشبینی دەکەن نرخی یەک کیلۆ گۆشت بۆ 12 بۆ 15 هەزار دینار دابەزێت.

گۆشەیەکی دیکە: وەزارەتی بارزگانی و پیشەسازی هەرێمی کوردستان بۆ ڕێگریكردن لە زیاتر بەرزبوونەوەی نرخی گۆشتی سوور چەند ڕێكارێكی ئاراستەی ئەنجوومەنی وەزیران کردوون:

-   هەڵگرتنی باج لەسەر هاوردەكردنی ئاژەڵی زیندوو بۆ ماوەی شەش مانگ.

-  كەمكردنەوەی ماوەی كەرەنتینەی ئاژەڵ لە دەروازە سنوورییەکان.