لە عێراق ژمارەیەک جادووگەر دەستگیردەکرێن

ئاڤا نیوز

لە چوارچێوەی هەڵمەتێک لە بەغدا و پارێزگاکانی دیکە، وەزارەتی ناوخۆی عێراق دەستگیرکردنی 48 جادووگەر و نوشتەکاری  ئاشکراکرد.

چیرۆکی سەرەکی: لە ماوەی دوو هەفتەی ڕابردوو بەڕێوەبەرایەتیی بەرەنگاربوونەوەی بازرگانیکردن بە مرۆڤەوە هەڵمەتێکی بەرفراوانی لە بەغدا و پارێزگاکانی دیکەی عێراق ئەنجامداوە و ئەو شوێنانەی کردووەتە ئامانج کە کاری جادووگەری و نووشتەکاری تێدا دەکرێت.

ڕاگەیێنراوی فەرمی: وەزارەتی ناوخۆی عێراق لەبەیاننامەیەکدا ڕایگەیاند: بەڕێوەبەرایەتیی بەرەنگاربوونەوەی بازرگانیکردن بە مرۆڤەوە لەچوارچێوەی هەڵمەتێکی دوو هەفتەییدا 48 جادووگەر و نوشتەکار کە کاری نوشتە و ڕووقیەی شەرعیان دەکرد دەستگیرکرد.

- وەزارەتی ناوخۆی عێراق ئاماژەی بەوەشکرد، تۆمەتباران تێوەگلاون بە تێکدانی ژیانی کۆمەڵایەتی و خێزانیی هاونیشتمانییان بەتایبەتی بە ئامانجگرتنی ژنان، ئەمەش پێشێلکردنی ئاشکرای مافی مرۆڤە.

ئەمەش بزانە: ئەو کەسانەی لە بەرامبەر وەرگرتنی بڕێک پارە نووشتە و جادوو بۆ خەڵک دەکەن، بەپێی یاسای 456 لە یاسای سزادانی عێراق  دەدرێنە دادگا و سزا دەدرێن.