تا 48 کاتژمێری داهاتوو تەرازووی پێداچوونەوەی مانگی سێ تەواو دەکرێت

ئاڤا نیوز

 

وەزارەتی دارایی و ئابووریی حکومەتی هەرێمی کوردستان، ئێستا سەرقاڵی ئامادەکردنی تەرازووی پێداچوونەوەی مانگی سێیە، سەرچاوەیەک لە وەزارەتی دارایی و ئابوورییش دەڵێت "پێش لیستی مووچەی مانگی چوار، تەرازووی پێداچوونەوە بۆ بە‌غدا ڕەوانە دەکەین".

زانیاریی تایبەت: سەرچاوەیەکی باڵا لە وەزارەتی دارایی و ئابووری حکومەتی هەرێمی کوردستان، بە ئاڤا میدیای ڕاگەیاند: تاوەکو 10ی مانگ، واتە 48 کاتژمێری دیکە تەرازووی پێداچوونەوە "میزان موراجەعە"ی مانگی سێ ئامادە دەکرێت، دوای وردبینیکردن و زانینی ڕێژەی خەرجی و داهات ڕەوانەی بەغدای دەکەین، هاوکات داهاتی مانگی سێش لەسەر ئەو بنەمایە دیاری دەکرێت و بەشی بەغدا ڕەوانە دەکەین.

- هەفتەی داهاتوو وەزارەتەکان لیستەکانمان بۆ ڕەوانە دەکەن، ئێمەش پێداچوونەوەیان بۆ دەکەین، بۆ ئەوەی بزانین هەڵەیان تێدایە یان نە، دواتر بە لیستی مانگی سێ بەراوردی دەکەین، چونکە بەغدا هیچ تێبینی لەسەر نەبووە، هەروەها تاوەکو 20ی مانگ هەوڵدەدەین لیستی مووچەی مانگی چوار ڕەوانەی بەغدا بکەین.

- ناردنی ناو و ژمارەی خانەنشینان بۆ بەغدا بەگوێرەی مانگەکان دەگۆڕێت، مانگانە ئەو کەسانەی خانەنشین دەبن، لە لیستی مووچە دەردەهێنرێن و دوای یەک بۆ دوو مانگ مامەڵەکانیان تەواو دەکرێت، دواتر داخلی لیستی مووچەی خانەنشینان دەکرێن.

ئەوەی پێویستە بیزانیت: ماوەی سێ ڕۆژە شەش هەزار فەرمانبەر خەرێکی ئامادەکردنی لیستی مووچەن بە سیستمی پەیرۆڵ.