پەرلەمانتارێکی شیعە: یاسای ڕیشەکێشکردنی بەعس هەموار ناکرێتەوە

ئاڤا نیوز

سووننەکانی عێراق لە ساڵیادی ڕووخانی حیزبی بەعس داوای ڕاگرتنی کارکردن بە یاسای دەستەی لێپرسینەوە و دادپەروەریی و ڕیشەکێشکردنی بەعس دەکەن، پەرلەمانتارێکی شیعەش دەڵێت، یاساکە کارا دەبێت بۆ دوورخستنەوەی لایەنگرانی بەعس لە پرۆسەی سیاسی، کۆدەنگی لەنێوان لایەنەکاندا هەیە.

ئەوەی پێویستە بیزانیت: سبەینێ 22 ساڵ بەسەر کۆتاییهاتنی ڕۆژێمی بەعس لە عێراق تێدەپەڕێت، ئەو ڕژێمەی چه‌ندین تاوانی دژی مرۆڤایەتی و جەنگی دژ بە گەلی کوردستان ئەنجام دا، لەم ڕۆژانەشدا سووننەکانی عێراق دەڵێن، دوو دەیە بەسەر ڕووخانی بەعس تێپەڕیووە و داوا دەکەن کارکردن بە یاسای دەستەی لێپرسینەوە و دادپەروەریی و  ڕیشەکێشکردنی بەعس ڕابگیرێت، چونکە باوەڕیان وایە شیعە ئەو یاسایانە وەک چەکێک دژی سەرکردەکانی سوونەکان بەکاردەهێنێت.

لێدوانی فەرمی: فراس ئەلمسلماوی، ئەندامی فراکسیۆنی دەوڵەتی یاسا لە پەرلەمانی عێراق بە ئاڤا میدیای ڕاگەیاند: حیزبی بەعسی تاوانبار شێوە کۆدەنگییەکی سیاسی تەواوی لەسەرە سەبارەت بە تاوانەکانیان، ڕێگریکردن و دوورخستنەوەیان لە  پرۆسەی سیاسی.

- بەرنامە و بیرکردنەوەی بەعس لەگەڵ سەردەمی نوێی عێراقدا ناگونجێت و بەهیچ شێوەیەکیش هەوڵ بۆ هەموارکردنەوەی یاسای ڕیشەکێشکردنی بەعس نییە، ڕەنگە هەندێک دەنگی نەشاز هەبێت  لەسەر ئەم بابەتە، بەڵام ئەوەی ڕوونە کە حیزبی بەعس لەلایەن گەلی عێراقەوە ڕەتکراوەتەوە.

- ئەمڕۆ دادگا و هێزە ئەمنییەکان لێپرسینەوە لەگەڵ هەر کەسێک دەکەن کە کار بۆ ئەو بیروباوەڕ و ڕێبازە بکات.