کۆمیسیۆن بۆ ئاڤا: هەڵبژاردنی پەرلەمانی عێراق بە یاسای هەڵبژاردنی ساڵی 2018 دەکرێت

ئاڤا نیوز

وتەبێژی کۆمیسیۆنی باڵای سەربەخۆی هەڵبژاردنەکان ڕایگەیاند، هەڵبژاردنی خولی شەشەمی پەرلەمانی عێراق ڕۆژی (11-11-2025)، بەیاسای کۆنی هەڵبژاردن (یاسای ژمارە 12ی ساڵی 2018) ئەنجام دەدرێت.

بۆچی گرنگە: بەگوێرەی یاسای هەڵبژاردنەکان ژمارە 12ی ساڵی 2018، عێراق بەسەر 18 بازنەی هەڵبژاردن دابەش دەکرێت، بەوپێیەش هەوڵەکان بۆ هەمواری یاساکە و زیادکردنی بازنەکانی هەڵبژاردن بێ ئەنجام بوون.

لێدوانی فەرمی: جومانە غەلای، وتەبێژی کۆمیسیۆنی باڵای سەربەخۆی هەڵبژاردنەکانی عێراق بە ئاڤا میدیای ڕاگەیاند، کۆمیسیۆن ئامادەیە بۆ بەڕێوەبردنی هەڵبژاردنی خولی شەشەمی پەرلەمانی عێراق لەو وادەیەی ئەمڕۆ ئەنجوومەنی وەزیران دیاریکرد.

- کۆمیسیۆنی هەڵبژاردنەکان ئامادەیە بۆ بەڕێوەبردنی هەڵبژاردن پاڵپشت بە یاسای هەڵبژاردنەکان ژمارە 12ی ساڵی 2018، ئامادەکارییەکانیش ماوەیەکە دەستیانپێکردووە، ئەویش لەڕێگەی دەستپێکردنی قۆناغی نوێکردنەوەی تۆماری بایۆمەتری.

- لە ماوەی داهاتوودا ئەنجوومەنی کۆمیسیاران خشتە و کاتی کارەکانی بۆ بەڕێوەبردنی هەڵبژاردن پەسەند دەکات، پرۆسەی نوێکردنەوەی تۆماری بایۆمەترییش لەڕێگەی 1079 بنکەوە بەردەوامە، ئەوەش گەرەنتی بەشداری هاووڵاتییان لە هەڵبژاردن دەکات وەک مافێکی دەستووریی.

ئەوەی پێویستە بیزانیت: ئەمڕۆ ئەنجوومەنی وەزیرانی عێراق بڕیاری دا ڕۆژی (11-11-2025) هەڵبژاردنی خولی شەشەمی پەرلەمانی عێراق بەڕێوەبچێت.

ئەمەش بزانە: بۆ هەڵبژاردنەکەی 11ی تشرینی دووەم، زیاتر لە 29 ملیۆن کەس لە عێراق و هەرێمی کوردستان مافی دەنگدانیان هەیە، بۆیەکەمجاریش لە دایکبووانی ساڵی 2007 دەنگ دەدەن.