لە عێراق بایکۆتی مامۆستایان بۆ پێنجەم ڕۆژ بەردەوامە

ئاڤا نیوز

بۆ پێنجەم ڕۆژی لەسەر یەک،  مامۆستا و فەرمانبەرانی پەروەردە لە بەغدا و پارێزگاکانی دیکەی عێراق درێژە بە خۆپیشاندان و گردبوونەوەکانیان دەدەن و داوا لە پەرلەمان دەکەن، حکومەت بە جێبەجێکردنی داواکارییەکانیان پابەند بکات.

چیرۆکی سەرەکی: ماوەی پێنج ڕۆژە لە پارێزگاکانی عێراق مامۆستایان بایکۆتی دەوامیان کردووە و داوای دابەشکردنی زەویی و زیادکردنی مووچەکانیان دەکەن، هەرچەندە حکومەتی عێراقیش بڕیاریداوە زەوی بۆ مامۆستا و فەرمانبەرانی پەروەردە تەرخان بکات و قەرزیی بانکییان بە سودی کەمتر لە 2% پێبدات، بەڵام مامۆستایان بەوە ڕازیی نین و داوای زیادکردنی دەرماڵە و مووچە دەکەن.

ڕاگەیێنراوی فەرمی: لیژنەی هەماهەنگیی مامۆستا و فەرمانبەران لە پارێزگا جیاوازەکانی عێراق ڕایانگەیاند، هەرچەندە فشاریان لەسەرە تا بایکۆت بشکێنن، بەڵام ئەمڕۆ پێنجشەممە کە هاوکاتە لەگەڵ کۆبوونەوەی پەرلەمان لەبارەی داواکارییەکانیان، بڕیاریان داوە درێژە بە بایکۆت و ناڕەزایی بدەن.

زانیاریی زیاتر: لیژنەکە داوا لە مامۆستا و فەرمانبەران دەکات لە شوێنی دیاریکراویی گردبوونەوە لە پارێزگاکانیان ئامادەبن، جەختیش دەکاتەوە کە بەهێزترین چەکی دەستیان ئەوەیە یەکگرتووبن تا داواکارییەکانیان جێبەجێ دەکرێن.