پێویستە ئۆکتانی بەنزین لەگەڵ تابلۆی پێش بەنزینخانەکان هاوتا بێت

ئاڤا نیوز

لیژنەكانی بەڕێوەبەرایەتیی نەوت و كانزاكانی هەولێر بەردەوامن لە هەڵمەتی پشكنینی كوالێتیی بەنزینی بەنزینخانەكان و ڕۆژانە نزیكەی 30 بۆ 40 بەنزینخانە دەپشكنن و ئەوانەی سەرپێچی دەکەن سزا دەدرێن.

وێنە گەورەکە: لە بەشێکی زۆری بەنزینخانەکانی هەولێر تابلۆی ئۆکتانی ئەو بەنزینەی دەفرۆشرێت هەڵواسراوە، بەشێک لە بەنزینخانەکان ڕێژەی ئۆکتانی بەنزینەکەیان لەگەڵ تابلۆکە هاوتا نییە، بۆیە سزا دەدرێن.

زانیاریی بەدەستهاتوو: بەڕێوەبەرایەتی نەوت و کانزاکانی هەولێر ئاگاداری بڵاوکردووەتەوە، ئەو بەنزینخانانەی کە ژمارەی ئۆکتانیان لەسەر تابلۆی پێش بەنزینخانەکە نووسیوە دەبێت یەکسان بێت لەگەڵ ئۆکتانی ئەو بەنزینەی دەیفرۆشێت، بەپێچەوانەوە ئەگەر لەپشکنینی لیژنەکان دەرچوو فێڵیان کردووە، ئەوا دادەخرێن و سزای داراییش دەدرێن.

ئەوەی پێویستە بیزانیت: لە سەنتەری شاری هەولێر و دەوروبەری 260 بەنزینخانە هەن ، لەو ژمارەیە ڕۆژانە 25 بۆ 30 بەنزینخانە بەنزین بە نرخی پاڵپشتی کراوی حکومی دەفرۆشن، کە بۆ هەر لیترێک بە 750 دینار بە شوفێران دەدرێت.