خامنه‌یی بۆ گرووپه‌ چه‌كداره‌كانی‌ عێراق : بەرامبەر‌ فشاره‌كانی‌ تره‌مپ مانۆڕبکەن

ئاڤا نیوز

بە فەتوایەک رێبەرى باڵای شۆڕشی کۆماری ئیسلامی ئێران، ‌ رێگه‌ به‌ گرووپه‌ چه‌كداره‌كانی‌ عێراق بۆ مانۆڕكردن بەرامبەر‌ فشاره‌كانی‌ دۆناڵد تره‌مپ ده‌دات.

چیرۆکی سەرەکی: بە گوێرەی راپۆرتێكی ڕۆژنامه‌ی‌ "شه‌رق ئه‌وسه‌تی لەندەنی"، گرووپه‌ چه‌كداره‌کانی "بەرەی مقاوەمەی ئیسلامی لەعێراق" فه‌توایه‌كیان له‌ عه‌لی خامەنەیی، رێبەرى باڵای شۆڕشی کۆماری ئیسلامی ئێران بە ناوی بەرپەچدانەوەی زیانەکان  پێگەیشتووە، فەتواکە‌ رێگه‌ به‌ مانۆڕكردنی ئەو گرووپانە ده‌دات بەرامبەر فشاره‌كانی‌ دۆناڵد تره‌مپ، سه‌رۆكی‌ ئه‌مریكا.

بڵاوکراوەی فەرمی: رۆژنامه‌ی "شه‌رق ئه‌وسه‌تی لەندەنی" له‌ زاری‌ چەند سه‌رچاوه‌یەکەوە‌ بڵاوی کردەوە: بەمەبەستی به‌رگریكردن له‌ به‌رژه‌وه‌ندییه‌كانی ئێران، فه‌تواكەی خامنەیی‌ فەرمانی به‌ گرووپه‌ چه‌كداره‌كان داوه‌ تاوەکو پلان B ئاماده‌ بكه‌ن، ئەگەر دانوستانه‌كانی وڵاتەکەی له‌گه‌ڵ ئه‌مریكییه‌كان شکستهێنا.

لە لایەکی دیکەوە: ڕۆژنامەکە باس لەوەش دەکات ئیسماعیل قائانی، فه‌رمانده‌ی فه‌یله‌قی‌ قودسی‌ سوپای پاسدارانی‌ ئێران، تیمێكی ئێرانی بۆ جێبه‌جێكردنی‌ ڕاسپارده‌یه‌كی پێشوو سەبارەت بە ڕاگرتنی هێرشی گرووپە چەکدارەکان دژی بەرژەوەندییەکانی ئەمریکا لە عێراق  جێگیرکردووە.

ئەوەی پێویستە بیزانیت: بڕیارە ڕۆژی شەممە، 2025-04-12، ستیڤ ویتکۆف، نێردەی سەرۆکی ئەمریکا بۆ ڕۆژهەڵاتی ناوەڕاست و عەباس عێراقچی، وەزیری دەرەوەی ئێران، سەبارەت بەچەند پرسێک لە شانشینی عومان کۆ ببنەوە.