وەزیری دەرەوەی ئەمریکا بۆ مەسرور بارزانی: سوپاس بۆ رۆڵتان لە پاراستنی ئاسایش و سەقامگیری ناوچەکە

ئاڤا نیوز

سەرۆکوەزیران مەسرور بارزانی لەگەڵ مارکۆ ڕۆبیۆ، وەزیری دەرەوەی ئەمەریکا پەیوەندییەکی تەلەفۆنیان ئەنجامدا، یەکێک لە تەوەرەکانی گفتوگۆی نێوانیان پرسی هەناردەکردنەوەی نەوتی هەرێمی کوردستان بوو.

ڕاگەیێنراوی فەرمی: سەرۆکوەزیران مەسرور بارزانی ڕایگەیاند، لەگەڵ مارکۆ ڕۆبیۆ، وەزیری دەرەوەی ئەمریکا بە تەلەفۆن قسەمان کرد، تاوتوێی دواین گۆڕانکاری ناوچەکە و بەهێزکردنی پەیوەندی دوو لایەنەمان کرد. هاوڕابووین لەسەر گرنگیی بەهێزکردن و پتەوکردنی دۆستایەتی و هاوپەیمانیی نێوان هەرێمی کوردستان و ویلایەتە یەکگرتووەکانی ئەمەریکا.

بەشێکی دیکە لە ڕاگەیێنراوەکەی سەرۆکوەزیران مەسرور بارزانی:

٠ هاوڕابووین لەسەر پێویستیی و گرنگیی دەستپێکردنەوەی هەناردەکردنەوەی نەوتی هەرێمی کوردستان لە ڕێگەی بەندەری جەیهانی تورکی.

٠ وەزیری دەرەوەی ئەمەریکا، سوپاس و پێزانینی وڵاتەکەی بۆ هەرێمی کوردستان دەربڕی کە بووەتە پەناگەیەکی ئارام بۆ پاراستنی گشت پێکهاتە نەتەوەیی و ئایینیەکان و ڕۆڵێکی گرنگیشی لە پاراستنی سەقامگیریی و ئاسایشی ناوچەکەدا هەیە.

٠ ڕێککەوتین لەسەر ئەوەی لە پەیوەندیی و هاوئاهەنگیی بەردەوامدا بین لە پێناو پاراستنی بەرژەوەندیی هاوبەش.

ئەوەی پێویستە بیزانیت: هەناردەکردنی نەوتی هەرێمی کوردستان لە 25-3-2023 وەستاوە، ئەگەرچی هەمواری یاسای بودجە وەک بەربەستێکی سەرەکی چارەسەرکراوە، بەڵام هێشتا چەند گرفتێک ماون کە پەیوەستن بە نێوان ئەپیکۆر و حکومەتی عێراق و هەنگاوەکان بەرەو چارەسەرکردنی ئەو گرفتانەن.