وەزارەتی دەرەوەی عێراق: کارمەندی دیپلۆماسییمان زۆر کەمە

ئاڤا نیوز

وەزارەتی دەرەوەی عێراق دەیان باڵیۆزی نوێ لە وڵاتان دادەنێت، لە ڕاگەیێنراوێکدا جەخت لەسەر گرنگیی پرۆسەکە دەکاتەوە و دەڵێت، هەڵبژاردنی باڵیۆزانی نوێ جێگەی بایەخی زۆرمانە.

وێنە گەورەکە: حکومەتی عێراق بۆ پڕکردنەوەی بۆشایی باڵیۆزخانەکان و ئەو دامەزراوانەی سەر بە وەزارەتی دەرەوەن، لە ئێستادا لە سەروبەندی دانانی دەیان باڵیۆزی نوێیە.

ڕاگەیێنراوی فەرمی: وەزارەتی دەرەوەی عێراق لە ڕاگەیێنراوێکدا ڕایگەیاند: پرۆسەی هەڵبژاردنی باڵیۆزانی نوێ جێگەی بایەخی زۆری وەزارەتەکەیە و گرنگی بە هەڵبژاردنی ئەو کەسە لێهاتووانە دەدات کە بە شێوەیەکی شیاو نوێنەرایەتی عێراق بکەن لە کۆڕبەندە نێودەوڵەتییەکان.

لەو چوارچێوەیەشدا وەزارەت جەخت لەوە دەکاتەوە، ئەم پرۆسەیە بە پێی میکانیزمی ورد و بابەتیانە بەڕێوەدەچێت، بە پابەندبوونی تەواو بە یاسای خزمەتگوزاری دەرەوە و سیاسەتە پەسەندکراوەکان.

گۆشەیەکی دیکەی دیمەنەکە: وەزارەتی دەرەوە ئەو لیستەی بەربژێرانی پۆستی باڵیۆز لە هەندێک دەزگای ڕاگەیاندن و سۆشیال میدیادا بڵاوکراونەتەوە ڕەتدەکاتەوە، ئاماژەش بەوە دەکات، ئەم بابەتە لەکاتی یەکلاییبوونەوەی تەنها لە ڕێگەی کەناڵە فەرمییەکانی وەزارەتەوە بڵاو دەکرێتەوە.

لە لایەکی دیکەوە: سەگڤان سندی، ئەندامی پەرلەمانی عێراق بە ئاڤا میدیای ڕاگەیاند: وەزارەتی دەرەوەی عێراق بڕیاری دانانی 38 باڵیۆزی نوێی داوە، هەشتیان لەسەر پشکی کوردن، ماوەتەوە لە پەرلەمان دەنگیان لەسەر بدرێت کە لەم هەفتەیە پەرلەمان بابەتەکە یەکلایی دەکاتەوە.