مامۆستایانی زیقاڕ هەڕەشەی مانگرتنی سەرتاسەری دەکەن

ئاڤا نیوز

 ئەگەر حکومەت وەڵامی داواکارییەکانیان نەداتەوە، مامۆستایانی زیقاڕ هەڕەشەی مانگرتنی سەرتاسەری گشتی و بایکۆتی هەڵبژاردنی داهاتووی پەرلەمان دەکەن.

 

وێنە گەورەکە: زیاتر لە هەفتەیەکە مامۆستایانی عێراق بایکۆتی هۆڵەکانی خوێندنیان کردووە و داوای زیادکردنی مووچە و دەرماڵەی پیشەیی و خێزان و منداڵ دەکەن، پیشبینیش دەکرێت لەگەڵ نزیکبوونەوەی وادەی هەڵبژاردنی پەرلەمانی عێراق بەرەی ناڕەزایەتیی فەرمانبەرانیش بگرێتەوە.

 

ڕاگەیێنراوی فەرمی: دەستەی نوێنەرانی مامۆستایان و فەرمانبەرانی پەروەردەی زیقاڕ لەبەیاننامەیەکدا ڕایگەیاند: چەند داواکارییەکی نوێمان خستووەتەڕوو و پێویستە لەسەر حکومەت ئاوڕی جددی لێبداتەوە، ئەوانیش بریتین لە:

- لەبەرچاوگرتنی هێرشکردنە سەر کارمەندانی پەروەردە، وەک دەستدرێژیکردنەسەر کارمەندان لەکاتی جێبەجێکردنی ئەرکەکانیاندا.

- پێویستە هەردوو وەزارەتی ناوخۆ و پەروەردە ئەرکی پاراستنی مامۆستایان لەکاتی هەر خۆپیشاندانێک لە ئەستۆ بگرن.

- هەموارکردنەوەی یاسای پاراستنی مامۆستایان ژمارە هەشتی ساڵی 2018 .لە کارنامەی پەرلەمانی عێراق.

 

لەلایەکی دیکەوە: پەرلەمانی عێراق لەسەر داواکاری لیژنەی پەروەردە گۆڕانکاری لە کارنامەی دانیشتنەکەی ڕۆژی دووشەممەی داهاتوو کرد و بڕگەی خوێندنەوەی یەکەمی بۆ پێشنیازە یاسای هەمواری یەکەمی وەزارەتی پەروەردەی زیاد کرد.