کۆمیسیۆن ڕێنمایی تایبەت بە تۆمارکردنی حیزب و هاوپەیمانێتییەکان بڵاودەکاتەوە

ئاڤا نیوز

 

کۆمیسیۆنی هەڵبژاردنەکانی عێراق ڕێنماییەکانی تۆمارکردنی حیزب و هاوپەیمانێتییەکانی بڵاوکردەوە و تاوەکو سەرەتای مانگی داهاتوو وادەکەی درێژ دەکاتەوە. 

 

وێنە گەورەکە: ئەنجوومەنی وەزیرانی عێراق ڕۆژی 2025-11-11ـی دیارکرد بۆ بەڕێوەچوونی هەڵبژاردنی خولی شەشەمی پەرلەمانی عێراق، کۆمیسیۆنی باڵای هەڵبژاردنەکانیش ئامادەیی خۆی بۆ بەڕێوەبردنی دەربڕی، پاڵپشت بە یاسای هەڵبژاردنەکانی ژمارە 12ـی ساڵی 2018 کە عێراق بەسەر 18 بازنەی هەڵبژاردن دابەش دەکات.

 

مەرجەکانی تۆمارکردنی هاوپەیمانی بەمشێوەیە:- 

-    نەبوونی کەموکوڕی لە شێوەی و ناوەڕۆکی داواکاریی تۆمارکردن. 

-    نابێت دروشمی هاوپەیمانیەتییەکە دژی ئادابی گشتیی بێت و دەبێت دووربێت لە ڕق و  کینەوە و تووندوتیژیی.

-    نابێت ناوی هاوپەیمانیەییەتییەکە دووبارە و پێشتر تۆمار کراو بێت. 

-    مەرج نییە سەرۆک ئەندامی یەکێک لە حیزبە پێکهێنەرەکانی بێت. 

-    ڕێگە پێدراو نییە کەسێک سەرۆکایەتیی زیاتر لە هاوپەیمانییەتییەک بکات. 

-    دەبێت بارەگای سەرەکی هاوپەیمانییەتییەکە دیار و دەستنیشان کراو بێت. 

 

ڕاگەیێنراوی فەرمی: ئەمڕۆ ئەنجوومەنی کۆمیسیارانی کۆمیسیۆنی هەڵبژاردنەکانی عێراق کۆبووەوە و بڕیاریدا لە ڕۆژی 15ی ئەم مانگەوە تۆمارکردنی هاوپەیمانی و حیزب و بەربژێرانی سەربەخۆ بۆ بەشداریکردن لە هەڵبژاردنی پەرلەمانی عێراق دەستپێبکات و تاوەکو 4ی مانگی داهاتوودا بەردەوام دەبێت.