مەسرور بارزانی پشتیوانی پەرلەمانی بەریتانیا بۆ كوردستان بەرز دەنرخێنێت

ئاڤا نیوز

سەرۆکوەزیران مەسرور بارزانی، دەستخۆشی لە پشتیوانییەكانی گرووپی دۆستایەتيی کوردستان لە پەرلەمانی بەریتانیا 'APPG' دەکات، و ڕۆڵی كاریگەرییان لە پەرەپێدانی پەیوەندییەكانی هەرێمی كوردستان و بەریتانیا بەرز نرخاند.

چیرۆكی سەرەكی: ئەمڕۆ 2025-04-13، سەرۆكوەزیران مەسرور بارزانی، پێشوازی لە شاندێکی گرووپی دۆستایەتيی کوردستان لە پەرلەمانی بەریتانیا (APPG)، بە سەرۆکایەتی جۆن سلینگەر، ئەندامی پەرلەمانی بەریتانیا و بەرپرسی گرووپەکە کرد.

ڕاگەیێنراوی فەرمی: لە ڕاگەیێنراوێکدا، سەرۆکوەزیران مەسرور بارزانی، سوپاسی ئەندامانی گرووپەکە و حکومەت و پەرلەمانی بەریتانیای کرد و دەستخۆشی لێکردن بۆ پشتیوانییان لە هەرێمی کوردستان و مافەکانی خەڵکی کوردستان و کارکردنیان لەپێناو پەرەپێدانی پەیوەندییەکانی هەرێمی کوردستان و بەریتانیا.

زانیاریی زیاتر: لە بەشێکی دیکەی کۆبوونەوەکە، پەیوەندییەکانی هەرێمی کوردستان و حکومەتی فیدراڵ و چارەسەرکردنی کێشەکانی نێوان هەولێر و بەغدا و دابینکردنی مافە دەستووری و شایستە داراییەکانی خەڵکی کوردستان و گرنگیی دەستپێکردنەوەی هەناردەکردنی نەوتی هەرێمی کوردستان، تاوتوێ کران.

باكگراوند: گروپی دۆستایەتی كوردستان لە پەرلەمانی بەریتانیا 'APPG' لە ژمارەیەك پەرلەمانتاری سەرجەم پارت و لایەنەكانی نێو پەرلەمانی بەریتانیا پێكهاتووە، ئامانجیان پشتیوانیكردنی كوردستان و بەهێزکردنی پەیوەندییەکانی هەرێمی کوردستان و بەریتانیایە لە بوارە جۆراوجۆرەکاندا.