پەرلەمانی عێراق مەرج و سزای دارایی لە ڕەشنووسی نوێی یاسای تووتن دیاردەکات

 

ئاڤا نیوز

سەرۆكی لیژنەی تەندروستی و ژینگە لە پەرلەمانی عێراق ئاماژە بە گرنگترین بڕگەكانی ڕەشنووسی یاسای نوێی جگەرە دەكات و ئاماژە بۆ ئەوە دەکات بەگوێرەی یاساکە سزای دارایی خێرا بەسەر سەرپێچیکاراندا دەسەپێنرێت.

وێنە گەورەکە: بەمەبەستی دوورخستنەوەی کەسانی تەمەن خوار 18 ساڵ لە بەکارهێنان و فرۆشتنی جگەرە و هاوشێوەکانی و پاراستنی تەندروستییان، پەرلەمانی عێراق بە نیازە بڕیارێک بۆ ئەم مەبەستە دەربکات.

لێدوانی فەرمی: ماجد شنگالی، سەرۆكی لیژنەی تەندروستی و ژینگە لە پەرلەمانی عێراق ڕایگەیاند: یاسای تووتن کە لەبەردەم لیژنەکەدایە، کێشانی نێرگیلە بۆ خوار تەمەن 18 ساڵی قەدەغەدەکات، هاوکات لە شوێنە داخراوەکان و کێشانی نێرگیلە لەلایەن پیاوان یان ئافرەتانەوە لە نزیک منداڵان قەدەغە دەکات.

زانیاریی زیاتر: بەگوێرەی یاساکە کێشانی جگەرە یان نێرگیله، هاوکات جگەرەی ئەلیکترۆنی لە ناو دامەزراوە حکومییەکان قەدەغەیە و هەر كەسێك سەرپێچی بكات، بە بڕی 50 هەزار دینار سزا دەدرێت.

قووڵتر: بە گوتەی شنگالی، ماددەیەکیان لە یاساکە داناوە، کە دەبێت ستیکەر لەسەر هەموو بەرهەمە هاوردەکراوەکانی جگەرە و تووتن هەبێت، بۆ دڵنیابوون لە هاتنە ناوەوەیان بۆ وڵات بە شێوەیەکی فەرمی، هاوکات باجیان بەسەردا دەسەپێنرێت.