لە ئەنبار سێ بازرگان بە 15 هەزار دەنکە حەبی کەپتاگۆنەوە دەستگیر دەکرێن

 

ئاڤا نیوز

وەزارەتی ناوخۆی عێراق دەستگیرکردنی سێ بازرگان بە 15 هەزار دەنکە حەبی کەپتاگۆن و دەستگیرکردنی گەشتیارێکیش بە نزیکەی کیلۆیەک و نیو ماددەی هۆشبەر لە جۆری کریستاڵ ڕادەگەیێنێت.

وێنە گەورەکە: هێزە ئەمنییەکانی عێراق لە سێ مانگی یەکەمی ئەمساڵدا، هەزار و 559 بازرگانی ماددەی هۆشبەریان دەستگیرکردووە، لەنێویاندا 194 بازرگانی نێودەوڵەتیین و هەزار و 365 بازرگانی دیکەیشیان ناوخۆیین، دەستیشیان بەسەر دوو تۆن و 156 کیلۆگرام ماددەی هۆشبەردا گرتووە.

لێدوانی فەرمی: عەمید مقیداد میری، وتەبێژی وەزارەتی ناوخۆی عێراق بە ئاژانسی فەرمی عێراقی ڕاگەیاند: لە بەردەوامی ئەرکەکانیان، بەڕێوەبەرایەتی گشتی کاروباری ماددە هۆشبەرەکان توانیان سێ بازرگانی ماددەی هۆشبەر لە بۆسەیەکدا لە پارێزگای ئەنبار دەستگیر بکەن، کە 15 هەزار دەنکە حەبی کەپتاگۆنیان پێبووە.

لە لایەکی دیکەوە: دەستەی دەروازە سنوورییەکانی عێراق ڕایگەیاند، هێزەکانیان لە دەروازەی شەلامچە دەستیان بەسەر بڕی کیلۆیەک و 409 گرام ماددەی هۆشبەر لە جۆری کریستاڵدا گرت کە لەنێو بوتڵێکی ئۆکسجین شاردرابووەوە، گەشتیارێکی بیانی نیازی وابوو بە قاچاخ بیهێنێتە نێو عێراق.