کۆمیسیۆن لەبارەی تۆمارکردنی حیزب و هاوپەیمانێتییەکان ڕوونکردنەوە دەدات

ئاڤا نیوز

 

کۆمیسیۆنی باڵای سەربەخۆی هەڵبژاردنەکانی عێراق ڕایگەیاند، ڕۆژانی 13 و 14ی نیسان تەنیا ڕاگەیاندن بۆ وادەی تۆمارکردنی حیزب و هاوپەیمانێتییەکان کراوە، تۆمارکردنەکەش بەشێوەی فەرمی لە بەیانییەوە دەستپێدەکات.

 

وێنە گەورەکە: بڕیارە 2025-11-11 هەڵبژاردنی خولی شەشەمی پەرلەمانی عێراق بەڕێوەبچێت، کۆمیسیۆنی باڵای هەڵبژاردنەکانیش ئامادەیی خۆی بۆ بەڕێوەبردنی هەڵبژاردن لەو وادەیە دەربڕیووە، پاڵپشت بە یاسای هەڵبژاردنەکانی ژمارە 12ـی ساڵی 2018 کە عێراق بەسەر 18 بازنەی هەڵبژاردن دابەش دەکات.

 

ڕاگەیێنراویی فەرمی: کۆمیسیۆنی باڵای سەربەخۆی هەڵبژاردنەکانی عێراق لە ڕوونکردنەوەیەکدا باسی لەوەکردووە، دوێنێ و ئەمڕۆ تەنیا ڕاگەیاندن بۆ وادەی تۆمارکردنی حیزب و هاوپەیمانێتییەکان بۆ بەشداریکردن لە هەڵبژاردنی پەرلەمان کراوە.

 

- دوێنێ ئەنجوومەنی کۆمیسیارانی کۆمیسیۆنی هەڵبژاردنەکان بڕیاریدا لە ڕۆژی 15ی ئەم مانگەوە تۆمارکردنی هاوپەیمانی و حیزب و کاندیدانی سەربەخۆ بۆ بەشداریکردن لە هەڵبژاردنی پەرلەمانی عێراق دەستپێبکات و تاوەکو 4ی مانگی داهاتوودا بەردەوام دەبێت.