لاڤرۆڤ: ڕێککەوتن لەگەڵ ئەمریکا سەبارەت بە ئۆکراینا ئاسان نییە

ئاڤا نیوز

 

ئەمریکا سوورە لەسەر هێنانەدی پرۆسەی ئاشتی لەنێوان ڕووسیا و ئۆکراینا. وەزیری دەرەوەی ڕووسیاش دەڵێت، “ڕێککەوتن لەگەڵ ئەمریکا بەتایبەت لەسەر بەشە سەرەکییەکانی ڕێککەوتنی ئاشتی ئاسان نییە."

 

وێنە گەورەکە: جەنگی سێ ساڵەی نێوان ڕووسیا و ئۆکراینا لەگەڵ گەڕانەوەی دۆناڵد ترەمپ بۆ کۆشکی سپی گۆڕانکاریی گەورەی بەخۆیەوە بینی. بەنێوەندگیری ئەمریکا، دووجار دانووستاندنەکانی ئاشتی بۆ ڕووسیا و ئۆکراینا لە سعودیە بەڕێوەچوو، ترەمپیش سوورە لەسەر کۆتاییهێنان بەم شەڕە و ڕازیکردنی لایەنەکان لەسەر ئاگربەست.

 

لێدوانی فەرمی: سێرگی لاڤرۆڤ، وەزیری دەرەوەی ڕووسیا لە چاوپێکەوتنێکدا لەگەڵ ڕۆژنامەی کۆمێرسانت، کاتێک پرسیاری ئەوەی لێکرا کە ئایا مۆسکۆ و واشنتن چۆن ڕێکدەکەون لەسەر هەندێک بابەتی ڕێککەوتنی ئاشتی مۆسکۆ و کیێڤ، لە وەڵامدا ڕایگەیاند، “ڕێککەوتن لەگەڵ ئەمریکا بەتایبەت لەسەر بەشە سەرەکییەکانی ڕێککەوتنی ئاشتی بۆ کۆتاییهێنان بەشەڕی ئۆکراینا ئاسان نییە بەڵام گفتوگۆیان لەسەر دەکرێت.''

 

ئەوەی لەبارەیەوە دەگوترێت: دۆناڵد ترەمپ، سەرۆکی ئەمریکا چەندین جار ڕایگەیاندووە، دەیەوێت کۆتایی بە " گۆمی خوێن"ـی شەڕی سێ ساڵەی نێوان ڕووسیا و ئۆکراینا بهێنێت.