وردبینی سەرەتایی لە لیستی مووچەی مانگی چوار دەستیپێکرد

ئاڤا نیوز

وردبینی سەرەتایی لە لیستی مووچەی مانگی چوار لە هەولێر دەستیپێکرد، داهاتی ناوخۆش کۆکراوەتەوە و لەم ڕۆژانە بۆ بەغدا دەنێردرێت، بەپێی زانیارییەکان بڕەکەی نزیکەی 49 ملیار دینارە.

چیرۆکی سەرەکی: لە دوێنێوە سەرجەم وەزارەت و دەستەکان بە سیستەمی پەیرۆڵ لیستی مووچەیان بۆ وەزارەتی دارایی ناردووە، لە وەزارەتی داراییش وردبینی سەرەتایی دەستی پێکردووە، بۆ ئەوەی هەر کەموکوڕییەکی هەبێت چاک بکرێت، دواتر بۆ بەغدا بنێردرێت.

زانیاریی تایبەت: بەپێی ئەو زانیارییانەی بە ئاڤا دراون، تا کۆتایی ئەم هەفتەیە وردبینی تەواو دەبێ، کۆتایی ئەم هەفتەیە یان سەرەتای هەفتەی داهاتوو لیستی مووچەی مانگی چوار بۆ وەزارەتی دارایی عێراق دەنێردرێت.

زانیاریی زیاتر: بڕیارە هەفتەی داهاتوو شاندێکی تەکنیکی وەزارەتی دارایی و ئابووریی هەرێمی کوردستان بچێتە بەغدا بۆ وەڵامدانەوەی هەر پرسیار و تێبینییەک لەبارەی لیستی مووچەی مانگی چوارەوە.

زانیاریی بەدەستهاتوو: لەبارەی میزان موراجەعە، واتا تەرازوی پێداچوونەوە و ناردنی داهاتی ناوخۆ بۆ بەغدا کە دوو هەنگاو پێش ناردنی مووچەن، ئاڤا زانیویەتی میزان موراجەعە کە داهات و خەرجی وەزارەت و دەستەکان دەگرێتەوە، تەواو بووە و تەنیا یەکخستنی ماوە.

ئەمەش بزانە: داهاتی ناوخۆش کۆکراوەتەوە، ئەم مانگە نزیکەی 49 ملیار دینار ڕادەستی وەزارەتی دارایی عێراق دەکرێت، پارەکەش بە کاش لە هەولێر دەدرێت بە لقی هەولێری بانقی ناوەندی.