فایلی خەڵک؛ دوای بەدواداچوونی ئاڤا ئەندامانی لیژنەی کوالێتی کۆنترۆڵ دیاری دەکرێن

ئاڤا نیوز

ماوەی چوار مانگە سەرۆک و ئەندامانی لیژنەی کوالێتی کۆنترۆڵی دەرمان و ئامێرە پزیشکییەکان خانەنشین بوون، هاووڵاتیان نیگەرانن لەوەی کارەکانیان بەهۆی دواکەوتنی پێکهێنانی لیژنەکەوە ڕاگیراوە.

وێنە گەورەکە: بەڕێوەبەرایەتیی کوالێتی کۆنترۆڵ نووسراوێکی بۆ وەزارەتی تەندروستی کردووە، بۆ ئەوەی سەرۆک و ئەندامی نوێ دیاری بکرێن، وەزارەتی تەندروستیش ڕەزامەندی لەسەر داوە و لە سێ تا چوار مانگ و 11 ڕۆژ پێش ئێستا، بۆ لایەنە پەیوەندیدارەکانی ناردووە.

نووسراوی فەرمی: بەگوێرەی نووسراوەکە هەریەک لە دەستەی وەبەرهێنان و وەزارەتی بازرگانی و پیشەسازی نوێنەری خۆیان بۆ لیژنەکە دیاری نەکردووە، ئەمەش کارەکانی هاووڵاتیانی ڕاگرتووە و داوایان لە ئاڤا کرد بەدواداچوونی بۆ بکات.

لێدوانی فەرمی: د.محەممەد شوکری، سەرۆکی دەستەی وەبەرهێنان بە ئاڤای گوت: ڕۆژی 13ی ئەم مانگە وەڵامی ئەم نووسراوەمان داوەتەوە و ئەندازیار 'زانا یەحیا' وەک نوێنەری دەستەی وەبەرهێنان بۆ لیژنەکە دیاری کراوە.

لەلایەکی دیکەوە: د. مەعاف عەبدوڵڵا، بەڕێوەبەری گشتیی کاروباری کارگێڕی و دارایی لە وەزارەتی تەندروستی بە ئاڤای گوت: وەزارەتی بازرگانی و پیشەسازی باسی لەوە کردبوو، نووسراویان پێنەگەیشتووە، بۆیە ڕۆژی 14ی ئەم مانگە جارێکی دیکە نووسراوەکەیان بۆ وەزارەتی بازرگانی و پیشەسازی ڕەوانە کردووەتەوە، بۆ ئەوەی نوێنەری خۆیان دیاری بکەن.

بە تەنیشت ئەم بابەتە: نەوزاد شێخ کامیل، بەڕێوەبەری گشتیی لە وەزارەتی بازرگانی و پیشەسازی بە ئاڤای گوت: ئێستا نووسراوەکەمان بەدەست گەیشتووە و بەزووترین کات نوێنەر بۆ لیژنەکە دیاری دەکەین.