پارتی و یەکێتی لەم دوو ڕۆژەدا کۆ دەبنەوە

ئاڤا میدیا

لەم دوو ڕۆژەی داهاتوو جارێکی تر شاندی باڵای پارتی و یەکێتی کۆدەبنەوە، وتەبێژی پارتییش دەڵێت لەم کۆبوونەوەیە گفتوگۆ لەسەر دابەشکردنی پۆستەکان دەکرێت.

وێنە گەورەکە: شاندە باڵا و تەکنیکییەکانی پارتی و یەکێتی لە دانوستانەکانی پێکهێنانی کابینەی نوێی حکومەت بەردەوامن و کارەکان بۆ پێکهێنانی کابینەکە تەواوکراون، تەنیا دابەشکردن و یەکلاییکردنەوەی پۆستەکان ماوە.

لێدوانی فەرمی: مەحموود محەممەد، وتەبێژی پارتی دیموکراتی کوردستان بە ئاڤا میدیای ڕاگەیاند: لە دوایین کۆبوونەوەیان لەگەڵ یەکێتی کە لە پیرمام بەڕێوەچوو، چوونەتە ناو وردەکاری چۆنیەتی پێکهێنانی کابینەی دەیەمی حکومەت، لە کۆبوونەوەی داهاتووشدا کە لەم یەک دوو ڕۆژە دەکرێت، گفتوگۆ لەسەر دابەشکردنی پۆستەکان دەکرێت.

لە لایەکی دیکەوە: لە کۆبوونەوەیەکی سەرۆکوەزیران مەسرور بارزانی و شاندێکی ئەمریکیشدا بە سەرۆکایەتيی ڤیکتۆریا تەیلەر، جێگری یاریدەدەری وەزیری دەرەوەی ئەمەریكا، جەخت لە پێکهێنانی کابینەی نوێی حکومەتی هەرێمی کوردستان لە زووترین کات و بەر لە هەڵبژاردنی ئەمساڵی پەرلەمانی عێراق کرایەوە.