بۆ دەستپێکردنەوەی هەناردەی نەوتی کوردستان کۆبوونەوەیەکی دیکەی سێ قۆڵی دەکرێت

 

ئاڤا نیوز

هەفتەی داهاتوو حکومەتی عێراق، حکومەتی هەرێمی کوردستان و نوێنەری کۆمپانیاکانی بەرهەمهێنەری نەوت لە کوردستان (ئەپیکۆر) لە بەغدا کۆدەبنەوە و چارەسەرکردنی کێشەکانی بەردەم دەستپێکردنەوەی هەناردەی نەوتی هەرێمی کوردستان تاوتوێ دەکەن.

وێنە گەورەکە: سەرەڕای هەموارکردنەوەی یاسای بودجەی عێراق و دیاریکردنی 16 دۆلار بۆ کۆمپانیاکان لەبەرامبەر تێچووی دەرهێنانی هەر بەرمیلێکی نەوت، بەڵام تاوەکو ئێستا و بەهۆی تێبینی کۆمپانیا نەوتییەکان، هەناردەی نەوتی هەرێمی کوردستان دەستیپێنەکردووەتەوە.

لێدوانی فەرمی: ئومێد سەباح، سەرۆکی دیوانی ئەنجوومەنی وەزیرانی هەرێمی کوردستان لە سلێمانی بە ڕۆژنامەنوسانی ڕاگەیاند، بڕیارە شەممەی داهاتوو کۆبوونەوەیەکی سێ قۆڵی لەنێوان حکومەتی فیدڕاڵ و حکومەتی هەرێمی کوردستان و نوێنەری کۆمپانیاکانی بەرهەمهێنەری نەوت لە کوردستان (ئەپیکۆر) لە بەغدا بەڕێوەبچێت.

زانیاریی زیاتر: بە گوتەی ئومێد سەباح لەو کۆبوونەوەیەدا کار بۆ چارەسەرکردنی ناکۆکییەکان دەکەن کە تائێستا ڕێگربوون لەوەی هەناردەی نەوتی هەرێمی کوردستان دەستپێبکاتەوە، لەم بوارەشدا ئەوەی بە حکومەتی هەرێمی کوردستان بکرێت هاوکار و هەماهەنگ دەبێت بۆ دەستپێکردنەوەی هەناردەی نەوت.

لە لایەکی دیکەوە: مەزهەر محەممەد ساڵح، ڕاوێژکاری سەرۆکوەزیرانی عێراق ڕایگەیاند، گۆڕانکاری لە خەرجی بەرهەمهێنان و گواستنەوەی نەوتی کوردستان، هۆکاربووە بۆ ئەوەی تائێستا خشتەی بودجەی ساڵی 2025 ڕەوانەی پەرلەمان نەکرێت، چونکە ئەم بابەتە پێویستی بە دووبارە وردبینیی لە داهات و خەرجییەکان هەیە.