سەرۆک بارزانی سەردانی باوکی ئاڤێستا دەكات

ئاڤا نیوز

سەرۆک مەسعوود بارزانی لە دەڤەری شانەدەر سەردانی باوکی ئاڤێستای کرد، هاوخەمی خۆی بۆ دەربڕی و دڵنەوایی دایەوە، هەموو تیمەکانی ڕسپاردەوە بێ وچان هەرچییەکیان کردووە دەبێ تەرمەکە بدۆزنەوە و ئەوکارە تەنیا لەوان دەوەشێتەوە.


چیرۆكی سەرەكی: ڕۆژی 5-4-2025، مامۆستا ئاڤێستا یوسف بەرزنجی كە بۆ گەشت و سەیران سەردانی دەڤەری بارزانی كردبوو، لەوێ كاتێك دەچنە سەر ڕووباری ڕێزان براكەی لەسەر بەردێك دەخزێ و دەكەوێتە نێو ئاو و مامۆستا ئاڤێستاش بۆ دەربازكردنی براكەی دەچێتە پێش و ئەویش دەكەوێتە نێو ئاوەكە و دواجار براكەی ڕزگاری دەبێت و ئاڤێستاش ئاوی ڕووبار بێ ڕەحمانە دەیبات و ئەوە دوو هەفتەیە دەیان تیمی پسپۆر و خەڵكی خۆبەخش سەرقاڵی گەڕانن، تاوەكو ئێستا نەیانتوانیوە تەرمەكەی بدۆزنەوە.

زانیاریی بەدەستهاتوو: ئەمڕۆ چوارشەممە 16-4-2025، سەرۆك بارزانی لە شانەدەر سەردانی باوكی مامۆستا ئاڤێستای كردووە و جارێكی دیكە هاوخەمی خۆی بۆ یوسف بەرزنجی باوکی ئاڤێستا و بنەماڵەکەی دەربڕیوە.

زانیاریی تایبەت: بەپێی زانیارییەكانی ئاڤا میدیا، سەرۆك بارزانی بە باوكی ئاڤێستای گوتووە، "دڵی خۆت تووند مەکە پشتیوان بە خودا تەرمەکەی هەر دەدۆزینەوە، ئەوەی هاتووە  قەزا و قەدەرە و ڕەتناکرێتەوە و دەبێت پشوو درێژ بی و ئارام بگریت، پشتیوان بە خودا هەر دەگەینە ئامانج."

قووڵتر: لەمیانەی سەردانەكەیدا سەرۆك بارزانی، بە موقەدەم كاروان، بەڕێوەبەری بەرگریی شارستانیی سۆرانی گوتووە "بەهیچ شێوەیەک نابێ هەست بە ماندووبوون بکەن و درێغی بکەن، ئەو کارەش هەر لە خۆتان دەوەشێتەوە".

ئەوەی پێویستە بیزانیت: سەرۆك بارزانی دەستخۆشی لە دانیشتوانی دەڤەرەکە کردووە كە چوونە بەدەم کەسوکاری ئاڤێستاوە و دڵنەواییان کردوون، سەرۆک بارزانی گوتویەتی خەڵکی ئەم دەڤەرە هەروا بووە بۆ هاوکاریی و هاوخەمیی و هەرواش دەمێنێتەوە.

ئەمەش بزانە: باوکی ئاڤێستا وێنەیەکی ئاڤێستای بەخشیوە بە سەرۆک بارزانی.