نیویۆرک تایمز: ترەمپ ڕێگری لە هێرشێکی سەربازی ئیسرائیل بۆ سەر ئێران کردووە

ئاڤا نیوز

ڕۆژنامەی نیویۆرک تایمز بە پشتبەستن بە سەرچاوە ئاگادارەکان ڕایگەیاندووە، دۆناڵد ترەمپ هێرشێکی سەربازیی ئیسرائیلی بۆ سەر ئێران  هەڵوەشاندوەتەوە.

زانیاریی بەدەستهاتوو: ڕۆژنامەی نیویۆرک تایمز بە پشتبەستن بە سەرچاوە ئاگادارەکانی ناو ئیدارەی ئەمریکا و بەرپرسانی ئاگادار لە پلانە نهێنییەکانی ئیسرائیل ڕایگەیاندووە، ئیسرائیل پلانی هەبوو لە مانگی ئایاردا هێرش بۆ سەر دامەزراوە ئەتۆمییەکانی ئێران بکات.

بەپێی ڕۆژنامەکە، دۆناڵد ترەمپ، سەرۆکی ئەمریکا ڕێگری لەو هەوڵەی ئیسرائیل کردووە، بەڵام ئیسرائیل بە ئەمریکای وتوە، هێرشی سەربازییان پێ باشترە لە دانووستان لەگەڵ ئێران.

قووڵتر: ئیسرائیل پێشتر پلانی داڕشتووە بۆ هێرشکردنە سەر دامەزراوە ئەتۆمییەکانی ئێران بە ئامانجی لێدانی توانا سەربازییەکانی تاران بۆ پەرەپێدانی چەکی ئەتۆمی بۆ ماوەی ساڵێک، بەڵام ئەم هەوڵە پێویستی بە پشتیوانی ئەمریکا هەبووە، بەڵام ئەمریکا ئەمەی ڕەتکردووەتەوە، ترەمپ گوتویەتی هەر هێرشێک بۆ سەر ئێران دەبێتە هۆی هەڵگیرسانی شەرێکی بەرفراوان لە ڕۆژهەڵاتی ناوەڕاستدا.

باکگراوند: ڕۆژی 2025-04-12، یەکەم دانووستانی ناڕاستەوخۆ لەسەر بەرنامە ئەتۆمییەکەی ئێران، لە نێوان ئەمریکا و ئێران کرا و بڕیارە شەممەی داهاتووش جارێکی دیکە دانووستان بکرێت و ئەمەش نیگەرانی ئیسرائیلی لێکەوتووەتەوە داوای هێرشی سەربازی دەکات.