ئیدارەی خۆسەر: لە سووریا داوای حکومڕانی ناناوەندی و هاوبەشی دەکەین

ئاڤا نیوز

ئیدارەی خۆسەر لە ڕۆژئاوای کوردستان داوای سووریای ناناوەندی و هاوبەشی دەکەن، چونکە بە گوتەی ئەوان سیستمی ناوەندی قەیرانی زۆری بەرهەمهێناوە و پێداگری لەسەر ناوەندێتی لەلایەن دەسەڵاتی دیمەشقەوە واتای چوونە ناو ململانێی نوێیە.

چیرۆکی سەرەکی: لە ڕۆژی دووەم و کۆتایی دیداری سلێمانی، هاوسەرۆکی دەستەی پەیوەندییەکانی دەرەوەی ئیدارەی خۆسەر، بەشداری لە پانێڵێکدا کرد و تیشکی خستەسەر ڕێککەوتنی کورد لەگەڵ حکومەتی نوێی سووریا.

لێدوانی فەرمی: ئیلهام ئەحمەد، هاوسەرۆکی دەستەی پەیوەندییەکانی دەرەوەی ئیدارەی خۆسەر لەمیانەی بەشداریکردنیی لە پانێڵێکدا لە دیداری سلێمانی، ڕایگەیاند: ڕێککەوتنەکەی نێوان سەرۆکی سووریا و فەرماندەی گشتی هەسەدە، بۆ کورد و سووریاش زۆر گرنگ بوو و بەهۆیەوە کۆتایی بە هەموو ئەو تۆمەتانە هێنرا کە ئیدارەی خۆسەرییان بە سەربەخۆخوازیی ناودەبرد.

بەشێکی دیکە لە قسەکانی ئیلهام ئەحمەد:

٠ لە کۆتایی ئەم مانگە کۆبوونەوەی دیکە دەکرێن و گفتوگۆ لەسەر کێشە هەڵپەسێردراوەکان دەکەین لەوانەش پرۆسەی دەستووری، بوونیادنانەوەی وڵات و بەشداریی لە حکومڕانیدا.

٠ بەلامانەوە گرنگە فرە ڕەنگی پێکهاتەکانی سووریا لە حکومڕانی نوێی وڵاتەکەدا جێگەی بکرێتەوە و مافەکانی کوردیش لە دەستووری نوێی سووریادا جێگیر بکرێن.

٠ لە حاڵەتێکدا ئەگەر دیمەشق لەسەر ناوەندێتی حکومڕانیی پێداگربێت، ئێمە پارێزگاریی لە دامەزراوەکانمان دەکەین و لەگەڵ لایەنەکانی ناوخۆی سووریا زیاتر هەماهەنگیی دەکەین و بەشداریی لە هەموو کارێکی هاوبەشدا دەکەین.

باکگراوند: ڕۆژی 2025-03-10، ئەحمەد شەرع،  سەرۆكکۆماری سووریاو مەزڵووم عەبدی، فەرماندەی گشتی هێزەكانی سووریای دیموكرات هەسەدە ڕێککەوتنێکی مێژوویان واژۆکرد، بەگوێرەی ڕێککەوتنەکەش هەسەدە دەبێتە بەشێک لە وەزارەتی بەرگری سووریا و دەوڵەتی سووریاش هەموو مافەکانی کورد گەرەنتی دەکات.