قادسییەی کوێتی سوپاسی سەرۆکوەزیران مەسرور بارزانی دەکات

ئاڤا نیوز

یانەی قادسییەی کوێتی سوپاس و پێزانینی خۆی ئاراستەی سەرۆکوەزیران مەسرور بارزانی و پارێزگاری دهۆک دەکات بۆ ئەو پێشوازییە گەرمە و میواندارییەی لە دهۆک لێیان کراوە.

وێنە گەورەکە: ئێوارەی ڕۆژی 15ـی نیسان لە یاریگەی یانەی دهۆک یاریی کۆتایی جامی کەنداو لە نێوان هەردوو یانەی دهۆک و قادسیەی کوێتی بەڕێوەچوو. یانەی دهۆک یارییەکەی بردەوە و بۆ یەکەمجار لە مێژوویدا بووە پاڵەوانی جامی کەنداو.

ڕاگەیێنراوی فەرمی: بەگوێرەی ڕاگەیێنراوی یانەی قادسیەی کوێتی، شێخ فەهد تەلال فەهد سەباح، جێگری سەرۆکی دەستەی کارگێڕی یانەی قادسییە سوپاس و پێزانینی خۆی ئاراستەی مەسرور بارزانی، سەرۆکی حکومەتی هەرێمی کوردستان و ئارین بارزانی، کوڕەکەی و دکتۆر عەلی تەتەر پارێزگاری دهۆک دەکات و ستایشی مامەڵەی ئاست بەرزی خەڵکی پارێزگای دهۆک دەکات.

زانیاریی زیاتر: جێگری سەرۆکی دەستەی کارگێڕی یانەی قادسییە ئاماژە بۆ ئەوەش دەکات، ئەو پێشوازییە نایاب و بەخشندەییەی لە شاندی یانەکەمان کرا، تەنیا لەسەر ئاستی فەرمی نەبوو، بەڵکو لەسەر ئاستی جەماوەریش بوو. خەڵکی دهۆک، بەگەنج و پیرەوە، هێمای میهرەبانی و نموونەی میوانداری و مامەڵەی ڕەوشت بەرزی بوون. ئەو مامەڵە و میواندارییە سەلمێنەری ئەوەیە لایەنی وەرزشی باشترین ڕێگایە بۆ لێک نزیککردنەوەی گەلان و چەسپاندنی پەیوەندی برایانەیان.