سەرۆکی ڕووسیا و ئەمیری قەتەر لە کۆشکی کریملن کۆدەبنەوە

ئاڤا نیوز

 

بۆ تاوتوێکردنی دۆسیەی گاز و پێشهاتەکانی ڕۆژهەڵاتی ناوەڕاست، ئەمڕۆ ئەمیری قەتەر بە سەردانێکی فەرمی گەشتە مۆسکۆ.

 

وێنە گەورەکە: لە چوارچێوەی پەرەپێدانی پەیوەندییەکانی هەردوو وڵات بە تایبەت لە بواری وزە و هەناردەکردنی گازی سرووشتی، ئەمڕۆ پێنجشەممە شێخ تەمیم بن حەمەد، ئەمیری قەتەر بە سەردانێکی فەرمی گەشتە مۆسکۆی پایتەختی ڕووسیا و لەگەڵ ڤلادیمێر پووتین، سەرۆکی ڕووسیا کۆبوونەوەی ئەنجامدا.

 

لێدوانی فەرمی: ڤلادیمێر پووتین، سەرۆکی ڕووسیا لە مەراسیمی پێشوازی لە ئەمیری قەتەر ڕایگەیاند، ڕووسیا دەیەوێت پەیوەندییە بازرگانیەکان لەگەڵ قەتەر پەرەپێبدات و کار و پرۆژەی هاوبەشیان لە بواری بەرهەمهێنان و هەناردەکردنی گازی سروشتی هەبێت، لە ڕێگەی کۆمپانیای ڕوسنەفتەوە کە ڕۆڵێکی گەورە دەبینێت لە بەردەوامی پەیوەندییەکان ئاستی بەرهەمهێنان و بازرگانی هەردوو وڵات بەرز بکرێتەوە.

 

لەلایەکی دیکەوە: شێخ تەمیم بن حەمەد، ئەمیری قەتەر ڕایگەیاند: "ڕووسیا هاوبەشێکی سەرەکی و گرنگی قەتەرە و هاوکاریەکانتان هەرگێز لە بیر ناکەین، ئامانجی سەردانەکەم پەرەپێدان و بەهێزکردنی پەیوەندییەکانی نێوان هەردوو وڵات و تاوتوێکردنی کۆمەڵێک پرسی گرنگی پەیوەست بە ڕۆژهەڵاتی ناوەڕاست و بە تایبەت سووریا و فەڵەستینەوە دەبێت و ئامانجمانە پێکەوە کار بکەین بۆ چارەسەرکردن و ڕووبەڕووبونەوەی ئاڵنگارییەکانی ناوچەکە."