ئامادەکردنی لیستی مووچە تەواو بوو، سەرەتای هەفتەی داهاتوو بۆ بەغدا دەنێردرێت

ئاڤا نیوز

 

ئامادەکاریی لیستی مووچەی مانگی چوار تەواو بووە، سەرەتای هەفتەی داهاتوو شاندێکی تەکنیکی وەزارەتی دارایی کوردستان لەگەڵ خۆیان دەیبەنە بەغدا و لەوێ وردبینیکردن و ڕێککارەکانی خەرجکردنی پارە دەستپێدەکات. 

 

وێنە گەورەکە: وەزارەتی دارایی و ئابووری هەرێمی کوردستان چەند ڕۆژێکە بەچڕی کار لەسەر ئامادەکردنی لیستی مووچەی مانگی چوار، میزان موراجەعە و ناردنی داهاتی مانگی سێ دەکات، بۆ ئەوەی لە زووترین کاتدا ڕەزامەندی خەرجکردنی مووچە لە بەغداوە بێت و دەست بەدابەشکردنی مووچەی مانگی چوار بکرێت.

 

لێدوانی فەرمی: هیوا ئەفەندی، سەرۆکی فەرمانگەی تەکنەلۆژیای زانیاری حکومەتی هەرێمی کوردستان بە ئاڤای ڕاگەیاند، بڕیارە سەرەتای هەفتەی داهاتوو، ڕۆژی یەکشەممە یان دووشەممە، شاندێکی تەکنیکی وەزارەتی دارایی و ئابووریی سەردانی بەغدا بکات و لەگەڵ خۆیان لیستی مووچە ببەن.

 

- ئامادەکردنی لیستی مووچەی فەرمانبەرانی مەدەنی و سەربازی و خانەنشینان تەواو بووە و هیچ کێشەیەکی نەماوە.

لەلایەکی دیکەوە: ڕێباز حەملان، بریکاری پێشووی وەزارەتی دارایی عێراق بۆ ئاڤا پشتڕاستی کردەوە کە ڕۆژی یەکشەممە یان دووشەممە لیستی مووچە بۆ بەغدا دەنێردێت بۆ بەغدا، لیستەکەش هاوشێوەی مانگی سێیە، هەندێ گۆڕانکاریی بچووک کراون، بۆ نموونە ئەو فەرمانبەرانەی ئەم مانگە خانەنشین بوون ناویان لە لیستی مووچە دەرهێنراوە.

- کێشەیەکی ئەوتۆ لەبەردەم خەرجکردنی پارە نییە و چاوەڕوان دەکرێت وردبینیکردن زوو تەواو بێت و پارە زوو بنێردرێت.

- لەگەڵ گەیشتنی لیستی مووچە، لە وەزارەتی دارایی عێراق وردبینیکردن و ڕێکارەکانی خەرجکردنی پارە دەستپێدەکەن، ڕێککارەکان لە بەغدا هاوشێوەی مانگەکانی ڕابردوون و چەند ڕۆژێکیان پێدەچێت.

- پێشبینی دەکرێت پێش تەواوبوونی مانگی چوار، پارە بنێردرێت و دابەشکردنی مووچە دەستپێبکات.