كەناڵی جەزیرە: كەرتی گەشتیاری دەبێتە گرنگترین سەرچاوەی داهاتی كوردستان

ئاڤا نیوز

ماڵپه‌ڕى که‌ناڵى جه‌زیره‌ له‌ به‌دواداچوونێکدا ئاشکراى ده‌کات، له‌ چه‌ند ساڵى داهاتوودا که‌رتى گه‌شتیارى، ده‌بێته‌ گرنگترین سه‌رچاوه‌ى داهاتی هه‌رێمى کوردستان، بۆ ئەم مەبەستەش حکومه‌تى هه‌رێمی کوردستان پلانێکی داڕشتووە ساڵانە 20 ملیۆن گەشتیار ڕابکێشێت.

 

وێنە گەورەکە: کەناڵی جەزیرە، بەدواداچوونێکی تێروتەسەلی لەسەر کەرتی گەشتیاری لە هەرێمی کوردستان بڵاوکردووەتەوە و باسی لەوە کردووە حکومەتی هەرێمی کوردستان پلانی هەیە پڕۆژە گەشتیارییەکان بگەیێنێتە هەزار و 500 پرۆژە بەئامانجی ڕاکێشانی 20 ملیۆن گەشتیار.

 

بڵاوکراوەی فەرمی: ماڵپەڕی کەناڵی جەزیرە بڵاویکردووەتەوە، لەساڵانی داهاتوودا هەرێمی کوردستان دەبێتە یەکێک لەو ناوچانەی کە لەبواری گەشتیاریدا دەبێتە دڵی ڕۆژهەڵاتی ناوەڕاست.

 

پێدراوە ڕاستییەکان: به‌پێی داتاکانی ڕێکخراوى گه‌شتیارى سه‌ربه‌ نه‌ته‌وه‌ یه‌کگرتووه‌کان، نه‌خشه‌ى گەشتیاری دونیا له‌دواى په‌تاى کۆرۆنا گۆڕاوە و هاتنی گەشتیار بۆ ڕۆژهەڵاتی ناوەڕاست 23% زیادی کردووە و هەرێمی کوردستانیش خۆی بۆ ئەو گۆڕانکارییە ڕیشەییە ئامادە کردووە‌ و بایه‌خێکى زۆر به‌ که‌رتى گه‌شتیارى ده‌دات.

 

خاڵە ئەرێنییەکان: بەپێی ڕاپۆرتەکەی جەزیرە هەرێمی کوردستان کۆمەڵێک تایبەتمەندی هەیە کە وایکردووە ببێتە رووگەیەکی گەشتیاری گرنگ لەوانەش:

- تا کۆتایی ساڵی پار، ژمارەی پڕۆژە گەشتیارییەکانی گەیاندە هەزار و 250 پڕۆژە و دەیەوێت تا ساڵی 2030، بگاتە هەزار و 500 پرۆژە.

- هەبوونى سروشتێکى جوان.

- یاساکانى وه‌به‌رهێنان له‌ هه‌رێمى کوردستان ڕێگەخۆشکەرە بۆ پێشخستنی کەرتی گەشتیاری.

- ئارامی و سەقامگیری.

- خەرجی کەم لە ئەستۆی گەشتیار.