نەخۆشخانەی سیدەكان تەواوبووە و پێویستی بە كارمەند و كەلوپەلی پزیشكییە

ئاڤا نیوز

 

جێبەجێکردنی پرۆژەی نەخۆشخانەی گشتیی سیدەکان تەواوبووە و بەمنزیکانە بۆ خزمەتی هاووڵاتیان دەکرێتەوە.

 

وێنە گەورەکە: دروستکردنی نەخۆشخانەی 25 قەرەوێلەیی لە قەزای سیدەکان یەکێکی دیکەیە لە دەسکەوتە گرنگەکانی کابینەی نۆیەمی حکومەتی هەرێمی کوردستان کە بەگوژمەی چوار ملیار و 366 ملیۆن دینار دروست دەکرێت و گەیشتووەتە قۆناغی کۆتایی و یەکەمجارە نەخۆشخانەی لەمجۆرە لە دەڤەری سیدەکان دروست دەکرێت.

 

لێدوانی فەرمی: ئیحسان چەلەبی قایمقامی قەزای سیدەکان تایبەت بە ئاڤا ڕایگەیاند، تەلاری نەخۆشخانەکە تەواوبووە تەنیا دابینکردنی کەلوپەل و ئامێرە پزیشکییەکان ماون، جگە لە دامەزراندنی ژمارەیەک کارمەندی تەندروستی بەشێوەی گرێبەست. هاوکات لەڕێگەی ئاڤاوە هیوای خواست وەزارەتی تەندروستی هەم کارمەند و هەمیش پێداویستی پزیشکی بۆ نەخۆشخانەکە دابین بکات.

 

بۆچوونی لایەنی بەرامبەر: ئاڤا بەڵێن و بڕیاری ئامادەکاری وەزیری تەندروستی بۆ دابینکردنی پێداویستیيەکان و داواکاری و تێبینیيە هونەریيەکان وەرگرتەوە کە لەنزیکترین کاتدا بۆیان دابین دەکرێت.

 

ئەوەی پێویستە بیزانیت: نەخۆشخانەی سیدەکان له‌سه‌ر ڕووبەڕی 10 هەزار مەتر چوارگۆشە دروست ده‌کرێت، پێکدێت له‌ (دوو هۆڵی نەشتەرگەری، بەشی فریاکەوتنی خێرا، بەشی ئافرەتان و منداڵان، نۆرينگه‌ى ددان، بەشی تیشک، تاقیگە و دەرمانخانە، بەشی کارگێڕی و خزمەتگوزاری نەخۆشخانە و کارگەی بەرهەمهێنانی ئۆکسجین).
 
بۆچی گرنگە: سیدەکان دەڤەرێکی دوورە دەستە و 21 هەزار هاووڵاتی لێ دەژی تا ئێستا نەخۆشخانەی نەبووە و ئەوەی هەیە ژمارەیەک بنکەی تەندروستین کە تەنها دەتوانن فریاگوزاری سەرەتایی پێشکەش بکەن و بەناچاری نەخۆش ڕەوانەی نەخۆشخانەکانی شاری سۆران دەکرێت، بە کردنەوەی ئەو نەخۆشخانەیە پێداویستی تەندروستیی هاووڵاتیانی دەڤەری سیدەکان چارەسەر دەبێت، لۆد و بارگرانیش لەسەر نەخۆشخانەکانی سۆرانیش نامینێت.