یەكێتی نیازی هەیە پەیوەندییەكانی لەگەڵ توركیا پتەو بكات

ئاڤا نیوز

قوباد تاڵەبانی، جێگری سەرۆكوەزیرانی هەرێمی كوردستان و ئەندامی مەكتەبی سیاسیی یەكێتی، بە جێگری وەزیری دەرەوەی توركیای ڕاگەیاندووە، حیزبەكەی مەبەستیەتی پەیوەندییەكانی لەگەڵ توركیا پتەو بكات و بەرەو ئاستێكی باشتریش بچێت.

چیرۆكی سەرەكی: لەمیانی كۆبوونەوەی قوباد تاڵەبانی، جێگری سەرۆکوەزیران و ئەندامی مەكتەبی سیاسیی یەكێتی نیشتمانی كوردستان لەگەڵ د. نوح یەڵماز، جێگری وەزیری دەرەوەی تورکیا، چەند پرسێكی جێی بایەخی هەردوولا تاوتوێ كران.

ڕاگەیێنراوی فەرمی: نووسینگەی قوباد تاڵەبانی بڵاویكردووەتەوە، لەو دیدارەدا تاڵەبانی جەختیکردووەتەوە لە پشتگیریکردنی یەکێتیی نیشتمانیی کوردستان لە پرۆسەی ئاشتی لە توركیا، ئامادەیی بۆ هەر جۆرە هاوكارییەك لەپێناو سەرخستنی پرۆسەكە دەربڕی.

بابەتە ستراتیژییەكە: لە كۆبوونەوەكە، باس لە پەیوەندییەكانی یەكێتی و توركیا كراوە، هەردوولا هاوڕابوون لەسەر گرنگیی پتەوكردنی پەیوەندییەكان كە ئێستا بەرەو ئاستێكی باشتر دەڕوات.

زانیاریی زیاتر: لەبارەی گفتوگۆکانی پێکهێنانی کابینەی دەیەمی حکومەتی هەرێمی كوردستان، قوباد تاڵەبانی ڕایگەیاند، گفتوگۆکان بە ئاراستەیەکی باشدا دەڕۆن و نیەتی باش هەیە بۆ رێککەوتن لەسەر پێکهێنانی حکومەتێکی کارا و بەهێز کە لە ئاستی چاوەڕوانییەکانی هاووڵاتیاندا بێت.