بڕیارێکی نوێ بۆ خانەنشینان دەردەکرێت؛ هەرێمی کوردستان دەگرێتەوە؟

ئاڤا نیوز

بەشێک لە خانەنشینانی عێراق دەتوانن وادەی خانەنشینبوونیان دوابخەن. ئەو بڕیارە ئەو فەرمانبەرانە دەگرێتەوە کە لە مانگی تەمموز خانەنشین دەبن، بەڵام ئەو بڕیارە لە هەرێمی کوردستان جێبەجێ نەکراوە.

وێنە گەورەکە: بەپێی نووسراوێكی فەرمی كە وێنەیەكی دەست ئاڤا كەوتووە، ئەو فەرمانبەرانەی كە ساڵانە لە یەكی حەوت خانەنشین دەبن، دەتوانن خانەنشینبوونەكەیان بۆ 31ی دوازدەی هەمان ساڵ دوابخەن، ئەگەر خۆیان ئارەزووی ئەوە بكەن دوای بخەن.

زانیاریی تایبەت: بەپێی بەدواداچوونەکانی ئاڤا سەبارەت بەوەی، ئایا فەرمانبەرانی هەرێمی كوردستانیش لەو بڕیارە سوودمەند دەبن یاخود نا،  سەرچاوەیەک لە بەڕێوەبەرایەتیی گشتیی خانەنشینی كوردستان وتی، ئەو بڕگەیە لە هەرێمی كوردستان جێبەجێ نەكراوە، تەنها لە دەسەڵاتی وەزیری ئەو فەرمانبەرەیە كە خانەنشین دەبێت كە بەپێی پێویستی فەرمانگەکەی، لە مەرجی تەمەن هەڵاوێری بكات و لە دەسەڵاتی بەڕێوەبەرایەتیی خانەنشین نییە.

لەلایەکی دیکەوە: پەرلەمانتار، سۆران عومەر پێشنیازی كردووە ئەو بڕگەیە لە هەرێمی كوردستانیش جێبەجێ بكرێت.

ئەوەی پێویستە بیزانیت: بەپێی ماددەی 34 لە بڕگەی دووەم لە یاسای خانەنشینی یەكگرتوو، ئەو فەرمانبەرانەی كە ساڵانە لە یەكی حەوت خانەنشین دەبن، دەتوانن خانەنشین بوونەكەیان بۆ 31ی 12ـی هەمان ساڵ دوابخەن، بەڵام ئەوە لە دەسەڵاتی وەزیری ئەو فەرمانبەرەیە كە خانەنشین دەبێ و دەتوانێت ئیستسنا (هەڵاوێر)ـی بكات بەپێی پێویستی فەرمانگەکەی.