سەرۆکوەزیران مەسرور بارزانی پیرۆزبایی جەژنی قیامە لە کریستیانەکان دەکات

ئاڤا نیوز

سەرۆکوەزیران مەسرور بارزانی لە جەژنی هەستانەوە (قیامە) پەیامێک بڵاودەکاتەوە و دەڵێت، جەژنەکە ببێتە مایەی بەهێزتربوونی بنەماکانی بەیەکەوەژیان.

وێنە گەورەکە: سەرۆکوەزیران مەسرور بارزانی بە بۆنەی جەژنی هەستانەوە (قیامە)، پیرۆزبایی لە کریستیانەکانی هەرێمی کوردستان و عێراق و جیهان دەکات.

پەیامی فەرمی: لە پەیامەکەی سەرۆکوەزیران مەسرور بارزانیدا هاتووە، "ئومێدەوارم لە خۆشی و شادیدا، جەژن بەسەر ببەن و ئەم بۆنە پیرۆزەیە، ببێتە مایەی سەقامگیربوونی ئاشتی و ئارامی و بەهێزتربوونی بنەماکانی بەیەکەوەژیان، تەبایی و خۆشەویستی لە نێوان گشت پێکهاتەکانی هەرێمی کوردستان".

- جەژنی هەستانەوە پیرۆز بێت و هەردەم لە بەختەوەریدا بن.

ئەوەی پێویستە بیزانیت: دوای جەژنی لە دایكبوونی مەسیح كە دەكەوێتە سەری ساڵی نوێی زاینی، جەژنی هەستانەوە "قیامە" لەلای مەسیحییەكان بە دووەم جەژن دادەنرێت، ئەم جەژنە لای شوێنكەوتووانی ئایینی مەسیحی، واتە زیندوو بوونەوەی مەسیح دوای لە خاچ درانی. بۆ پیرۆز ڕاگرتنی ڕۆژەکە مەسیحییەكانی جیهان لە دوای 50 ڕۆژ بە ڕۆژووبوون، پێشوازی لە جەژنی هەستانەوە "قیامە" دەكەن، ساڵانە هەزاران شوێنکەوتووی مەسیح لە هەرێمی کوردستان پێشوازی لە قیامە دەکەن.