هەسەدە و ئەنەکەسە لەبارەی "کۆنگرەی نەتەوەیی کورد" لە ڕۆژئاوای کوردستان ڕێککەوتن

ئاڤا نیوز

دوای مڵملانێیەکی توند و ڕەتکردنەوە و بەشدارینەکرنی لەلایەن ئەنەکەسەوە، ناوی کۆنگرەی نیشتمانی کورد لە ڕۆژئاوای کوردستان بۆ کۆنفرانسی نیشتمانی دەگۆڕدرێت و گوتەبێژی ئەنەکەسەش هەواڵەکە پشتڕاست دەکاتەوە.

بۆچی گرنگە: لە كۆنگرەی نەتەوەیی كورد جەخت لەسەر پاراستنی مافەكانی كورد لە سووریا دەكرێتەوە، هاوكات داوای هەڵوەشاندنەوەی سەرجەم ئەو رێككەوتنە نهێنی و ئاشكرایانە دەكرێت كە كاریگەرییان لەسەر سەروەریی نەتەوەیی سووریا هەیە.

لێدوانی فەرمی: نافع عەبدوڵڵا، ئەندامی کۆمیتەی پارتی دیموكراتی كوردستان-سووریا لە کاتی بەشداریکردنی لە هەواڵەکانی کاتژمێر یەکی ئاڤا بەهدینان گوتی: دوای ئەوەی ئەنەکەسە بەشدارینەکردنی لە کۆنگرەی کورد لە سووریا ڕاگەیاند و داوای کرد، ناوی کۆنگرەکە بگۆڕدرێت و بکرێتە کۆنفرانس، "ئەوکاتە بەشداری دەکەین و پێکەوە هەنگاو دەنێن بۆ چوونە دیمەشق".

- دوو ڕۆژ پێش ئێستا مەزلووم عەبدی لەگەڵ ئەنەکەسە کۆبووەتەوە و پێی ڕاگەیاندوون، بۆئەوەی ببنە خاوەن گوتارێکی بەهێزی نەتەوەیی، "لەسەر داوای ئێوە کۆنفرانس دەکەین"، ئەنەکەسەش بە داواکەی فەرماندەی گشتی هێزەکانی هەسەدە ڕازی بووە و بەشداریکردنیان لە کۆنفرانسەکە دووپات کردووەتەوە.

لەلایەکی دیکەوە: فەیسەڵ یوسف، گوتەبێژی ئەنجوومەنی نیشتیمانی کورد-ئەنەکەسە، بە ئاڤا میدیای گوت، "بەشداریکردنی ئێمە لە کۆنفرانسی نیشتمانی کورد لە سووریا یەکلابووەتەوە، بەڵام تا ئێستا کات و شوێنێ بەڕێوەچوونی دیارینەکراوە".

جیاوازی نێوان کۆنفرانس و کۆنگرە کە خاڵی ناکۆکەکانی نێوان ئەنەکەسە و هەسەدەیە چییە؟

ئەنەکەسە: سەرجەم گفتوگۆ و دانوستانەکانی ئێمە لەگەڵ پەیەدە و هەسەدە ڕێککەوتن بووە لەسەر بەستنی کۆنفرانس نەک کۆنگرە.

ئەنەکەسە: ئێمە دڵنیابووین، وەک پێویست داواکاری ئێمە بەهەند وەرنەدەگیران و بڕیارەکانیش دەسەپێندران و ڕاوێژکردنیش لاواز دەبوو.

ئەنەکەسە: جیا لە هێزە سیاسیەکان، دەبێت کەسانی کۆمەڵایەتی و ڕێکخراوانی سڤیلیش بەشداری کۆنگرەکە بن.

هەسەدە: تەنیا بە بەشداری هێز و لایەنە سیاسییەکان کۆنگرە ببەستین کە زۆربەیان لایەنگری هەسەدە بوون.

ئەوەی پێویستە بیزانیت: بەمەبەستی گەرەنتی بەشداریکردنی هەموو لایەنە سیاسییەکان، کۆنگرەی نیشتیمانیی کورد لە سووریا کە بڕیاربوو ڕۆژی هەینیی 18-4-2025 لە ڕۆژئاوای کوردستان بەڕێوەبچێت، بەڵام بەهۆی بەشدارینەکردنی ئەنەکەسە بۆ کاتێکی نادیار دواخرا .هاوکات بڕیاریشە دوای بەستنی کۆنفرانسەکە لیژنەیەکی یەکگرتوو بۆ دانوستان بچێتە دیمەشق.