قەیس خەزعەلی: سەرۆکی سووریا بێتە عێراق دەستگیردەکرێت

ئاڤا نیوز

ئەمینداری عەسایبی ئەهل ئەلحەق کە هاوکات یەکێکە لە لایەنە پێکهێنەرەکانی حکومەتی عێراق، دەڵێت، هاتنی سەرۆکی سووریا بۆ عێراق وادەکات یاسای بەسەردا جێبەجێ بکرێت و دەستگیر بکرێت، چونکە ناوبراو فەرمانی دەستگیرکردنی لە عێراق هەیە.

وێنە گەورەکە: هەرچەندە ئەنجوومەنی باڵای دادوەریی عێراق ڕەتیدەکاتەوە هیچ فەرمانێکی دەستگیرکردنی بۆ ئەحمەد شەرع، سەرۆککۆماری سووریا دەرکردبێت، بەڵام بەشێک لە شیعەکان دەڵێن، شەرع فەرمانی دەستگیرکردنی هەیە و داوا دەکەن بەمەبەستی بەشداریکردن لە لوتکەی عەرەبی سەردانی عێراق نەکات.

ڕاگەیێنراوی فەرمی: قەیس خەزعەلی، ئەمینداری عەسایبی ئەهل ئەلحەق لە پەیامێکدا ئاماژەی بەوەکردووە، هەرچەندە بوونی پەیوەندیی لەنێوان عێراق و سووریا کارێکی گرنگ و پێویستە، بەڵام هێشتا زووە تا ئەحمەد شەرع سەرۆکی ئێستای سووریا سەردانی عێراق بکات.

زانیاریی زیاتر: بەوتەی خەزعەلی، هاتنی شەرع بۆ عێراق ڕەنگە کاردانەوەی لێبکەوێتەوە ئەگەر یاسای بەسەردا جێبەجێ بکرێت و دەستگیر بکرێت، جەختیش دەکاتەوە لەسەر ئەوەی "پێویستە هەمووان پابەندی بڕیارەکانی دادگای عێراق بن و ڕێزی لێبگرین".