ئەمریکا زیاتر لە 300 هێرشی ئاسمانی کردووەتە سەر یەمەن

ئاڤا نیوز

 

ئێوارەی ڕۆژی شەممە، ئەمریکا هێرشێکی بەرفراوانی بۆ سەر سەنعا و چەند ناوچەیەکی جیاوازی ژێر دەسەڵاتی حووسییەکان ئەنجامدا بەهۆیەوە دەیان کەس کوژراون.

 

وێنە گەورەکە: ڕۆژی شەممە 19-4-2025، فڕۆکە جەنگییەکانی ئەمریکا 50 هێرشی ئاسمانی بۆ سەر پێگە و بارەگاکانی حووسییەکان لە سەنعا و حودەیدە و عەمرا ئەنجامدا ئەمەش دوای زنجیرەیەک هێرشی چڕی ئەمریکا دێت بۆ سەر حووسییەکان لە باشوور و ڕۆژئاوای سەنعای پایتەختی یەمەن و پارێزگاکانی جەوف و سەعدە کە زیاتر لە 80 کەس کوژران.

 

ڕاگەیێنراوی فەرمی: فەرماندیی ناوەندی ئەمریکا ڕایگەیاند: تەنیا لە ماوەی مانگی ئازردا ئەمریکا 300 هێرشی ئاسمانی بۆ سەر یەمەن ئەنجامداوە بۆ لاوازکردنی ژێرخانی سەربازی و ئابووری ئەو گرووپە.

 

بۆچوونی لایەنی بەرامبەر: گرووپی حووسییەکان ڕایگەیاند، کە هێرشەکانی ئەمریکا بۆ سەر یەمەن زیاتر لە 900 هێرشی ئاسمانی کردووەتە سەر ناوچە جیاوازەکانی یەمەن و چەندین هاووڵاتیی سڤیل کوژراون.

 

باکگراوند: ڕۆژی 15-3-2025، دۆناڵد ترەمپ، سەرۆکی ئەمریکا فەرمانی دەستپێکردنی ئۆپەراسیۆنی  سەربازیی دژی حووسییەکان دەرکرد و هەڕەشەی لە ناوبردنی تەواوی تواناکانی ئەو گرووپەی نزیک لە ئێرانی کرد و وەک بەشێک لە هەوڵەکانی واشنتن بۆ سنووردارکردنی هەڕەشەکانی گرووپەکە بۆ سەر کەشتییەکانی لە دەریای سوور.