لە سنووری سلێمانی باڵندەی کێوی ڕاو دەکرێن و دەبرێنە دەرەوەی کوردستان

ئاڤا نیوز

 

ئاڤا میدیا بەدواداچوونێکی گرنگ و تایبەت بۆ پرسی ڕاوکردنی باڵندەی کێوی و فرۆشتنەوەی لە دەرەوەی هەرێمی کوردستان دەکات.

 

چیرۆکی سەرەکی: ڕاوچییەک لە سنووری سلێمانی، چەند وێنە و ڤیدیۆیەک لە تۆڕی کۆمەڵایەتیی تیکتۆک بڵاو دەکاتەوە، تێیدا بانگەواز بۆ فرۆشتنی باڵندە کێوییەکانی نێو شاخ و کێوەکانی سنووری سلیمانی دەکات، ئەو ڕاوچییە باڵندە کێوییەکان بەڕێگەی قاچاغ دەباتە ڕۆژهەڵاتی کوردستان و ئێران، لەوێ ساغیان دەکاتەوە و دەیانفرۆشێت.

 

زانیاریی تایبەت: ئاڤا میدیا لە سەرچاوەیەکی تایبەتەوە کە نەیویست ناوەکەی ئاشکرا بکرێت، زانیویەتی لەژێر پردەکەی سلێمانی کڕین و فرۆشتن بە چەندین جۆری جیاواز لە باڵندەی کێوییەوە دەکرێت، تەنانەت کڕیارانی بە ڕەگەز عەرەب بۆ کڕینی باڵندەی شاهین و بەحری سەردانی شوێنەکە دەکەن.

 

لێدوانی فەرمی: عەمید هێمن کەمەرخان، بەڕێوەبەری ڕاگەیاندنی بەڕێوەبەرایەتیی پۆلیسی دارستان و ژینگەی سلێمانی بە ئاڤا میدیای ڕاگەیاند: ئاگەداری ئەم کارە نین و هیچ سکاڵایەکیش لەسەر ئەو بابەتە تۆمار نەکراوە، هەر حاڵەتێکی لەم شێوەیەش هەبێت ئەوا بەپێی یاسا مامەڵەی لەگەڵدا دەکرێت.

 

پێدراوە ڕاستەکان: چۆن سزای ئەو کەسانە دەدرێت کە بازرگانی بە باڵندە کێوییەکانەوە دەکەن؟
بەپێی ڕێنمایی ژمارە یەک لە ساڵی 2015، ڕێنمایی تایبەت بە ڕاوکردن و پاراستنی ئاژەڵی کێوی و باڵندەکان کە لە ڕۆژنامەی وەقایعی کوردستان بڵاوکراوەتەوە، لە ماددەی پێنجەمدا هاتووە:

 
-تێکدانی هێڵانەی باڵندەکان (بەتاڵ بێت یان هێڵکە و بەچکەی تێدا بێت) قەدەغەیە، ئەگەر ڕوویدا نرخی باڵندەکە بەسەر ئەنجامدەرەکەیدا دەسەپینرێت.

-ئەو ئاژەڵ و باڵندانەی ناتوانن بگەڕینەوە سروشت و گواستنەوەیان بۆ دەرەوی هەرێمی کوردستان، سزا بەسەر ئەنجامدەری کارەکەدا دەسەپینرێت:-

سزای ڕاوکردنی بەشێک لە باڵندە کێوییەکان: 

-سزای ڕاوکردنی شاهین 10 ملیۆن دینارە.
-سزای ڕاوکردنی باڵەبان 10 ملیۆن دینارە.
-سزای ڕاوکردنی سێ کوژە 10 ملیۆن دینارە.
-سزای ڕاوکردنی لەیل 10 ملیۆن دینارە.
-سزای ڕاوکردنی لاجین 10 ملیۆن دینارە.
-سزای ڕاوکردنی کەوی دەری پێنج ملیۆن دینارە.
-سزای ڕاوکردنی فلامینگۆ سێ ملیۆن دینارە.
-سزای ڕاوکردنی پۆڕ 200 هەزار دینارە. 
-سزای ڕاوکردنی لەق لەق یەک ملیۆن دینارە.