لە پرسەیەکدا لە ڕانیە 11 ملیۆن دیناری هاووڵاتییەک دزرا

ئاڤا نیوز

 

بەپێی ڕاگەیێنراوێکی بەڕێوەبەرایەتی پۆلیسی ڕاپەڕین، تۆمەتبارێک لە ڕانیە، سێ هەزار دۆلار و حەوت ملیۆن دیناری هاووڵاتییەکی بردووە کە بۆ پرسە سەردانی ڕانیەی کردبوو.

 

چیرۆکی سەرەکی: ڕۆژی 15-4-2025 هاووڵاتییەک بۆ بەشداریکردن لە پرسەیەکدا دەچێتە شاری ڕانیە، بڕی سێ هەزار دۆلاری ئەمریکی و حەوت ملیۆن دیناری عێراقی لە ئۆتۆمبێلەکەیدا دەبێت و تاوەکو لە پرسەکە دێتە دەرەوە، پارەکەی لێ دەبرێت، هاووڵاتییەکە لای پۆلیس سکاڵای تۆمارکردووە و تۆمەتباری سەرەکی ئەنجامدانی دزییەکەش دەستگیرکراوە.

 

لێدوانی فەرمی: شۆڕش ئیسماعیل، وتەبێژی پۆلیسی ئیدارەی راپەڕین، بە ئاڤا میدیای راگەیاند، "ئەو هاووڵاتییەی لە پرسەکەدا دزی لێکراوە، هاتووەتە نووسینگەی نەهێشتنی تاوانی ڕانیە و سكاڵای تۆمارکردووە، لە سکاڵاکەیدا ئاماژەی بەوەداوە کە نزیکەی سێ هەزار دۆلاری ئەمریکی و بڕی حەوت ملیۆن دیناری عێراقی لە ناو ئۆتۆمبیلەکەیدا بووە و لەکاتی بەشداریکردن لەو پرسەیەدا لێی دزاروە".

 

زانیاریی زیاتر: پۆلیسی ڕاپەڕین پەڕاوی لێکۆڵینەوە بۆ دۆسیەکە دەکاتەوە و دوای بە داواداچوون و بەدەستهێنانی زانیاری پێویست، لە ماوەی کەمتر لە 24 کاتژمێردا ناسنامەی تۆمەتبار ئاشکرا دەکرێت و دەستگیر دەکرێت، تۆمەتبارەکە ناوی (ج.ح.پ)ە لە دایکبووی ساڵی 1985 و ڕەگەزی نێرە، تۆمەتبار خەڵکی شاری رانیەیە بەڵام لەدەرەوەی وڵات دەژی.

 

ئەوەی پێویستە بیزانیت: پۆلیسی ڕاپەڕین لە ڕاگەیێنراوێکدا بڵاویکردەوە، "لەکاتی دەستگیرکردنی تۆمەتبار تواندرا دەستبگیرێت بەسەر پارە دزراوەکەدا، دوای لێکۆڵینەوە لەگەڵیدا لە بەردەم دادوەری لێکۆڵینەوەدا دانینا بە تاوانەکەیدا و دەریش کەوت کە تۆمەتبار پێشینەی تاوانکاری هەیە و دووجاری دیکە بە تاوانی دزیکردن بەفەرمانی دادگا سزای بەسەردا سەپێندراوە، سەرەڕای ئەوە جارێکی دیکەش بە تۆمەتی تاوانی دزیکردن فەرمانی دەستگیرکردنی هەبووە".

 

پۆلیسی ڕاپەڕین ڕاشیگەیاندووە، "بڕیاردرا بە ڕاگرتنی تۆمەتبار بە پێی مادەی 446 لە یاسای سزادانی عێڕاقی و لێکۆڵینەوە لەگەڵیدا بەردەوامە".