پرۆژەی ڕووناکی دەگاتە چەند گەڕەکێکی دیکەی هەولێر و سلێمانی

ئاڤا نیوز

پرۆژەی ڕووناکی بەردەوامە لە فراوانبوون، لە کۆتاییەکانی ئەم مانگەش چەند گەڕەکێکی دیکەی هەولێر و سلێمانی دەبنە خاوەنی کارەبای 24 کاتژمێری.

وێنە گەورەکە: پڕۆژەی ڕووناكی کە مەبەست لێی دابینکردنی کارەبای 24 کاتژمێرییە بۆ هاووڵاتیانی هەرێمی کوردستان، دەبێت تاوەکو ساڵی 2026 کارەبای تەواوی شار و ناوچەکان ببێتە 24 کاتژمێری، ئێستا پرۆژەکە گەیشتووەتە ناو جەرگەی شارەکانی هەولێر، سلێمانی و دهۆک، پرۆژەکە ڕۆژ دوای ڕۆژ فراوان دەبێت.

زانیاریی بەدەستهاتوو: ئاڤا میدیا زانیویەتی، لە کۆتاییەکانی ئەم مانگە، پرۆژەی ڕووناکی، کارەبای 24 کاتژمێری لە 10 گەڕەکی دیکەی شاری هەولێر و دوو گەڕەکی دیکەی شاری سلێمانی جێبەجێ دەکرێت، بەمەش هاووڵاتیانی ئەم گەڕەکانە لە کارەبای 24 کاتژمێری سوودمەند دەبن.

ئەوەی پێویستە بیزانیت: دوای ئەوەی کارەبای 24 کاتژمێری دەگاتە ئەو 10 گەڕەکەی هەولێر، ژمارەی ئەو گەڕەکانەی لە هەولێر کارەبای 24 کاتژمێرییان هەیە دەبێتە 36 گەڕەک. ژمارەی گەڕەکەکانی سلێمانیش دەبێتە 12 گەڕەک.