مەترسیی دەکەوێتە سەر مووچەی 250 هەزار مووچەخۆری کوردستان

ئاڤا نیوز

بەهۆی خۆتۆمارنەکردنیان لە پڕۆژەی 'هەژماری من'، زیاتر لە 250 هەزار مووچەخۆر و خانەنشینی هەرێمی کوردستان مەترسیی لەسەر ڕاگرتنی مووچەکانیان هەیە. کە زۆرینەیان مووچەخۆری سنووری سلێمانین.

وێنە گەورەکە: هەنگاوەکانی حکومەتی هەرێمی کوردستان بۆ بە دیجیتاڵکردنی مووچەی مووچەخۆرانی هەرێمی کوردستان بەردەوامە، لەو چوارچێوەیەشدا 750 هەزار مووچەخۆر لە پرۆژەی 'هەژماری من' تۆمارکراون، 450 هەزار کارتی پرۆژەکە دابەشکراوە و 300 هەزار کارتیش ماوە دابەش بکرێت.  لەو 750 هەزار مووچەخۆرەی خۆیان لە هەژماری من تۆمار کردووە، تەنیا 100 هەزار کەسیان لە سنووری پارێزگاکانی سلێمانی و هەڵەبجەن.

زانیاریی زیاتر: لەو 250 هەزار مووچەخۆرە، زیاتر لە 90%ـیان مووچەخۆری سنووری سلێمانین، بەپێی زانیارییەکانی ئاڤا میدیاش 98%ـی مووچەخۆرانی هەولێر و دهۆک خۆیان لە پرۆژەی 'هەژماری من' تۆمار کردووە.

زانیاریی بەدەستهاتوو: بەپێی بڕیاری دادگای فیدراڵی، کە تەیف سامی و وەزارەتی دارایی عێراق زۆر جەختی لەسەر دەکەنەوە، دەبێت مووچەی سەرجەم مووچەخۆرانی کوردستان بە بانکی بکرێت و هاوشێوەی عێراق لەڕێگەی بانکەکانەوە مووچە وەربگرن کە ئێستا لە هەرێمی کوردستان پڕۆژەی 'هەژماری من' هەیە.

لە لایەکی دیکەوە: ئاڤا زانیویەتی لە ماوەکانی ڕابردوودا لە چەند کۆبوونەوەیەک، تەیف سامی حکومەتی هەرێمی کوردستان و لایەنە سیاسییەکانیان ئاگادار کردووەتەوە لەوەی، ئەگەر لە هەشت مانگی داهاتوودا واتا تاوەکو کۆتایی ئەمساڵ، فەرمانبەران و خانەنشینان هەژماری بانکی نەکەنەوە، ئەوا مووچەیان ڕادەگیرێت.

ئەوەی پێویستە بیزانیت: هۆشدارییەکە جدییە، هاوشێوەی بابەتی UPN - ژمارەی کەسی بێ هاوتایە، چۆن ساڵی ڕابردوو تەیف سامی وتی هەر مووچەخۆرێک UPN نەکات مووچەکەی ڕادەگیرێت و دواتر ڕایگرت، بەمەش هەر مووچەخۆریک خۆی لە سیستمی بانکی تۆمار نەکات، ئەوا مووچەکەی ڕادەگیرێت.

باکگراوند: لە چەند مانگی ڕابردوودا، سەدان مووچەخۆر لە هەرێمی کوردستان بەهۆی ئەوەی UPN ـیان نەکردبوو، مووچەکانیان لە فەرمانگەکانیان ڕاگیرا، بەمەش هەر مووچەخۆریک خۆی لە سیستمی بانکی تۆمار نەکات، ئەوا مووچەکەی رادەگیرێت.