هۆشدارییەک لەبارەی پڕکردنەوەی فۆڕمی ئەلیکترۆنی خۆراک بۆ خەڵکی کەرکووک

ئاڤا نیوز

بڕیارە لەم هەفتەیە ئەپڵیکەیشنی پسوولەی خۆراک لە عێراق و هەرێمی کوردستان کارا بکرێت، پێویستە لەکاتی پڕکردنەوەی فۆڕمەکە، سەرەتا لە ئەپڵیکەیشنەکە پارێزگاکە هەڵبژێریت.

چیرۆکی سەرەکی: شارەزایان و چالاکوانانی کەرکووک ئاگاداری خەڵکی کەرکووک و ناوچەکانی سنووری ماددەی 140 دەکەنەوە، کە لەهیچ شارێکی نێو هەرێمی کوردستان ئەپڵیکەیشنی تازەکردنەوەی فۆڕمی خۆراک دامەبەزێنن بەمەبەستی تازەکردنەوەی فۆڕم، چونکە هەر کەسێکی خەڵکی کەرکووک و دەوروبەری لەهەر شارێکی هەرێمی کوردستانەوە ئەو فۆڕمە پڕبکاتەوە، ڕاستەخۆ لای ئەو فەرمانگەییەی ئەو شارەدا ناوی تۆماردەکرێت.

لێدوانی فەرمی: نەوزاد شێخ کامیل، بەڕێوەبەری گشتی بارزگانی لە وەزارەتی بازرگانی و پیشەسازی بە ئاڤای گوت: ئەم بابەتە بەمشێوەیە نییە، بەڵکو لەکاتی پڕکردنەوەی فۆرمی خۆراک، پێویستە سەرەتا پارێزگاکە هەڵبژێریت، ئینجا زانیارییەکانی تر داخڵ بکەیت.

"واتا ئەگەر خەڵکی کەرکووک بیت، ئەتوانی لە هەولێرەوە یان لە سلێمانی یان هەر شارێکی تر فۆرمەکە پڕبکەیتەوە، بەڵام بە مەرجێک پارێزگاکە هەڵبژێرن، با ئەپڵیکەیشنەکە ئۆتۆماتیکی خۆی شوێنەکەت بۆ هەڵنەبژێ".